Lögfræðingurinn Helgi Áss Grétarsson sækist eftir 5. sæti á lista Sjálfstæðisflokksins í Reykjavík fyrir komandi borgarstjórnarkosningar. Prófkjör flokksins fer fram í mars næstkomandi.
Helgi Áss hefur vakið mikla athygli að undanförnu fyrir gagnrýni sína á svokallaða slaufunarmenningu og kallað eftir því að fyrirtæki bregðist ekki við sögum af samfélagsmiðlum, það sé í verkahring dómstóla að skera úr um sekt manna. Hefur hann meðal annars komið Ingó Veðurguð til varnar í umræðunni.
Það er þó ekki aðalatriðið hjá honum fyrir kosningarnar, í grein sem hann skrifar í Morgunblaðið í dag segir hann að yfirbygging Reykjavíkurborgar sé allt of mikil og vill hann ráðast í niðurskurð:
„Draga þarf úr umsvifum borgarinnar sem lúta ekki að skylduverkefnum hennar. Lækka þarf skuldir svo að greiðslur vaxta og afborgana séu ekki jafnhátt hlutfall af útgjöldum borgarinnar eins og raun ber vitni í dag,“ segir hann.
„Sóun fylgir opinberum framkvæmdum sem mislukkast. Kjörnir fulltrúar eiga að tryggja faglega ferla til að koma í veg fyrir slíkt og fylgja þeim ferlum eftir. Á þetta atriði vil ég leggja sérstaka áherslu.“
Helgi Áss er ekki hrifinn af Borgarlínu: „Eftir að hafa dvalist langdvölum í stórri evrópskri borg er ég sannfærður um mikilvægi góðra almenningssamgangna. Á hinn bóginn tel ég að núverandi útfærsla á borgarlínu sé of dýr og ólíkleg til að ná þeim markmiðum sem að er stefnt.“
