„Það er vandasamt að fara með vald. Það fer ykkur afskaplega illa og ég er ekki frá því að eftir því sem líður á kjörtímabilið séuð þið æ meira að færa ykkur nær einræði en lýðræði með valdníðslu, sýndarsamráði og ofsaköstum.“
Þetta segir Helga Vala Helgadóttir, þingmaður Samfylkingarinnar, um svar Bjarna Benediktssonar fjármálaráðherra. Bjarni tjáði sig í morgun um mál Þorvaldar Gylfasonar en eins og kunnugt er lagðist efnahags- og fjármálaráðuneytið gegn því að hann yrði ráðinn ritstjóri norræns hagfræðitímarits.
Bjarni skrifaði langa færslu um málið í morgun þar sem hann sagðist á engan hátt geta stutt sýn og áherslur Þorvaldar. Tölvupósturinn, sem starfsmaður ráðuneytisins sendi, hafa endurspeglað vilja hans þó hann hafi ekki vitað af tilnefningunni. „Ekki þarf að leggjast í mikla rannsóknarvinnu til að finna út hvaða hug Þorvaldur hefur borið til þeirra ríkisstjórna sem ég hef setið í,“ sagði Bjarni meðal annars.
Helga Vala er mjög ósátt við ákvörðun ráðuneytisins og gagnrýnir hún Bjarna harðlega.
„Nei, Bjarni, valdníðsla ykkar sjálfstæðismanna kemur mér ekkert á óvart en mig langar þó að benda á fáeina hluti: Þetta fræðirit er ekki gefið út til að styðja við stefnumótun fjármálaráðuneytisins á Íslandi heldur fagrit til upplýsinga - óháð stjórnmálaflokkum og þeirra afskiptum. Ég átta mig á því að það er þér og ykkur í Sjálfstæðisflokknum framandi, en það tíðkast víða um heim að óháð fagrit séu gefin út, ekki til að þóknast hagsmunaöflum heldur til faglegrar upplýsingar,“ segir Helga Vala meðal annars.
Kjarninn birti í morgun viðtal við Lars Calmfors, prófessor við Stokkhólmsháskóla og fyrrverandi ritstjóra Nordic Economy Policy Review. Lars mælti sjálfur með því að Þorvaldur yrði ráðinn ritstjóri tímaritsins og segir hann að pólitískar skoðanir eða stjórnmálaþátttaka fræðimanna eigi ekki að hafa áhrif á framgang þeirra í akademísk störf.
