Elísabet Brynjarsdóttir, verkefnastjóri Frú Ragnheiðar, segir mikilvægt að tryggja að jaðarsettum hópum hér á landi verði boðin bólusetning gegn COVID-19.
Elísabet segir að skilningur hennar sé sá að heimilislausir og aðrir jaðarsettir hópar séu í þrepi 9 af 10 þegar kemur að forgangi að bóluefni. „Þrátt fyrir að vera einn helsti áhættuhópurinn, vera útsettari en flestir aðrir og hafa takmarkað aðgengi að hreinlæti,“ segir hún á Twitter og bætir við:
„[Við] þurfum að spurja okkur spurninga á borð við: hver tryggir öryggi þeirra? Hver mun sjá til þess að jaðarsettir fái bólusetningar? Það er hætta á að þau verði eftir. Afhverju hefur aldrei verið fjallað sérstaklega um þau eða tilmæli til þeirra á upplýsingafundum?“
Andrés Ingi Jónsson, óháður þingmaður, leggur orð í belg og segir að annað sé uppi á teningnum í Þýskalandi til dæmis þar sem fólk í skýlum fyrir heimilislausa og á móttökustöðvum flóttafólks er í öðru þrepi, miklum forgangi sumsé.
Elísabet segir að þegar samfélagið hefur brugðist hópi af einstaklingum og ekki tryggt þeim þjónustu sem mætir þeirra þörfum hefði maður haldið að þau væru í forgangi í bólusetningu. „Þetta stendur og fellur smá með skorti á málsvarastarfi held ég, aldraðir hafa gífurlega öfluga málsvara,“ segir hún.
Samkvæmt reglugerð um bólusetningar hér á landi eru „einstaklingar sem eru í viðkvæmri stöðu vegna félagslegra- og efnahagslegra aðstæðna og eru í sérstakri áhættu“ í níunda þrepi af tíu. Þannig eru til dæmis eldri borgarar og starfsmenn, leik-, grunn- og framhaldsskóla ofar á forgangslistanum.
