„Í mínum huga er þetta ekki endilega rétta röðin“, sagði Kári Stefánsson, forstjóri Íslenskrar erfðagreiningar í þættinum 21 á Hringbraut í kvöld um forgangshópa við bólusetningu gegn Covid-19.
Væntanleg forgangsröðun stjórnvalda við bólusetningar á næsta ári er að setja heilbrigðisstarfsfólk í fremsta flokk. Hann bendir á að í Bandaríkjunum hafi það verið heilbrigðisstarfsfólk sem sýktist helst en þannig sé ekki reynslan á Íslandi. „Þegar við skoðuðum mótefni í Íslendingum þá leituðum við sérstaklega eftir mótefnum hjá starfsmönnum Landsspítalans og Heilsugæslunnar á Höfuðborgarsvæðinu og komumst að raun um að það var nákvæmlega sami hundraðshluti af heilbrigðisstarfsmönnum og Íslendingum almennt sem höfðu sýkst sem bendir til þess að heilbrigðisstarfsmenn séu ekkert meira útsettir fyrir smit heldur en aðrir“, segir Kári. Það sé ekki hægt að segja að þeir séu í sérstökum áhættuhópi.
Þróun bóluefna tveggja lyfjafyrirtækja, Pfizer með BioNtech og Moderna gegn Covid-19 er langt á veg komin. „Þetta hefur gerst á örskammri stundu og það er gaman að sjá hvernig lyfjaiðnaðurinn sem er venjulega dálítið klaufskur og seinn í svifum, gat brugðist við mjög hratt þegar raunverulega lá á“, segir Kári.
Vanalega tekur bóluefnaþróun fimm til tíu sinnum lengri tíma bendir Kári á en núna þrátt fyrir hraðann sé vel að verki staðið. „Það er búið að prófa þessi bóluefni á mjög stórum hópi manna“, segir Kári eða á 74 þúsund manns og ekkert gefið til kynna það sé ekki öruggt.
„Það skiptir mestu máli að bæði bóluefnin verja í kringum 95 prósent þeirra sem eru útsettir fyrir smiti. Það er ekkert sem bendir til þess að af þeim hljótist alvarlegar aukaverkanir“, fullyrðir Kári. Efnið virðist ekki beina ónæmiskerfinu að manninum sjálfum heldur eingöngu að veirunni.
Hann segir erfitt að spá til um hvenær bóluefnið berist hingað til lands: „Nú kemur annar kafli í þessum faraldri sem er kaflinn sem lýtur að því hvernig þjóðirnar munu koma til með að koma til móts hvor við aðra þegar kemur að því að dreifa þessu bóluefni“.
