Ólafur Stephensen, framkvæmdastjóri Félags atvinnurekenda, fer hörðum orðum um Vladimír Pútín Rússlandsforseta og Íslendinga sem reyna að réttlæta hernaðarbrölt hans í Úkraínu, í harðorðum pistli á Vísi.
Þar segist Ólafur trúa því að meirihluti almennings í Rússlandi styðji ekki að land þeirra ráðist á nágrannaríki af fyrrabragði.
„En valdasjúklingarnir í Kreml hafa yfirhöndina af því að í Rússlandi hefur lýðræðið verið fótum troðið. Þessi mikla þjóð á betra skilið en að þar komist ævinlega ný glæpaklíka til valda eftir að þeirri síðustu hefur verið steypt af stóli,“ skrifar Ólafur.
„Ég hef megnustu skömm á löndum mínum, sem reyna að réttlæta gjörðir Pútíns eða sýna þeim „skilning“. Þeir sem eru búnir að koma sér fyrir í því horni umræðunnar virðast allsendis firrtir þeim skelfilega veruleika sem nú blasir við í Evrópu,“ skrifar Ólafur.
Hann segir enga leið að nota „sjaldan veldur einn þá tveir deila“ eða „er þetta nú eitthvað verra en ...“-röksemdafærsluna. „Sem við sjáum sums staðar í óupplýstum afkimum samfélags- og fjölmiðla.“
