Sögusagnir þess efnis að tenging sé á milli 5G-fjarskiptanetsins og COVID-19 hafa af einhverjum ástæðum komist á kreik að undanförnu. Fjallað er um þetta á Vísindavefnum þar sem Jónína Guðjónsdóttir, lektor í geislafræði, varpar ljósi á málið.
Spurt var: Er eitthvað til í því að 5G-fjarskiptanet hafi áhrif á veiruna sem veldur COVID-19?
Jónína segir að í stuttu máli sé ekkert til í því að þetta tvennt tengist, eða að 5G fjarskiptanetið hafi nokkur áhrif á kórónuveiruna sem veldur COVID-19.
„Veiran sem veldur COVID-19 og 5G-fjarskiptanet eru tveir alveg ótengdir hlutir en sögusagnir um tengingu þarna á milli hafa þó komist á kreik,“ segir Jónína í svari sínu.
Hún bendir á að 5G-fjarskiptanet sé ný (fimmta) kynslóð fjarskiptatækni þar sem notuð er rafsegulgeislun. Eins og fjallað hefur verið ítrekað um er orsök COVID-19 veira sem smitast með snerti- og dropasmiti á milli manna.
„Rafsegulgeislun flytur bara orku og getur ekki flutt efni. Því er útilokað að nota hana til að dreifa veirum eða öðru efni. Í raun er 5G-rafsegulgeislun í eðli sínu mjög lík eldri kynslóðum (4G og 3G) og áhrifin á mannslíkamann (og aðrar lífverur) þar með lítið breytt,“ segir í svari Jónínu sem segir enn fremur að ekkert bendi til þess að notkun5G-rafsegulgeislunar sé skaðleg mönnum, sé farið er eftir lögum og reglum.
„Það stafar hins vegar raunveruleg hætta af veirunni sem veldur COVID-19.
Þekking er eitt besta vopnið í baráttunni við vágesti eins og veiruna sem veldur COVID-19. Því miður geta flökkusögur, eins og þessi um tengsl 5G og COVID-19, dregið athyglina frá því sem raunverulega skiptir máli, það er, að nota aðferðir sem sýnt hefur verið fram á að virka til að hefta útbreiðslu veirunnar.“
Jónína segir ekkert dularfullt við það að COVID-19 og 5G finnist á sömu stöðum á jörðinni því hvort tveggja er algengara þar sem fólk er fleira. „COVID-19 hefur náð til nánast allra landa en ekkert samhengi er á milli þess hve illa lönd verða fyrir barðinu á veirunni og þess hvort innleiðing 5G er hafin eða hve langt hún er komin.“
