„Ég hugsaði með mér: Nú er tíminn til að hefna mín á þeim,“ segir Virgill Scheving Einarsson, landeigandi í Skjaldarkoti og Efri-Brunnastöðum, í samtali við Fréttablaðið í dag.
Virgill hefur hafnað því að leyfa sveitarfélaginu Vogum að leggja hjólreiða- og göngustíg inn á land sitt. Virgill viðurkennir að hann hafi ekkert á móti þessum göngustíg, hann skipti hann í raun engu máli en ástæða þess að hann hafni beiðni sveitarfélagsins sé sú að hann sé að hefna sín.
Allt á þetta sér aðdraganda sem rakinn er í Fréttablaðinu en fyrir tíu árum, árið 2010, ákvað Virgill að loka vegi á landi sínu vegna hávaða, ryks og ónæðis frá umferðinni. Bæjarstjórnin vildi halda veginum opnum og fór svo að grjót, sem Virgill lét setja á veginn, var fjarlægt. Málið fór fyrir dóm sem hafði í för með sér töluverðan kostnað.
Þessu til viðbótar hafa staðið yfir deilur um lausagöngu fjár. Bendir Virgill á að bærinn hafi ekki haldið við sauðfjárhólfi sunnan við Reykjanesbrautina eins og hann eigi að gera.
Virgill segir að göngustígurinn sem bærinn vill leggja skipti hann engu máli. Hann er þó enn sár út í framgöngu sveitarfélagsins.
„Ég væri alveg til í að draga ákvörðun mína til baka ef bærinn myndi borga lögfræðikostnaðinn til baka vegna vegamálsins,“ segir hann en um 600 þúsund krónur var að ræða á sínum, upphæð sem í dag væri hægt að framreikna í á aðra milljón króna.
