Útvarpsmaðurinn Rikki G lenti í fyrsta skipti á ævi sinni í lúsmýinu svokallaða á Akureyri um helgina. Þessu greindi hann frá í útvarpsþættinum Brennslunni.
Þar mætti Guðmundur Óli Scheving, meindýrafræðingur og ræddi lúsmýið svokallaða. „Ég var að lenda í fyrsta skipti í þessari pest, þessu lúsmý. Ég hef séð fullt af myndum en hef alltaf sloppið við þetta, en ég slapp ekki núna,“ segir Rikki.
Guðmundur segir að einungis ein tegund af lúsmý sé að finna á Íslandi, það geti Íslendingar prísað sig sæla fyrir. Vísindamenn telji lúsmýið hafa búið á Íslandi áratugum saman.
„Flugan var alltaf til úti í bithaganum hjá búfénaðinum. En svo gerist eitthvað, hún færir sig til. Norður, vestur, austur og út um allt,“ útskýrir Guðmundur.
Hann hafi fyrst orðið var við fluguna fyrir sex árum síðan, í Kjósinni. „Það er ekki búið að gefa út sérstaka ástæðu fyrir því af hverju þetta er að breytast svona, en það er ýmislegt að breytast í þessu. Við erum að fá allskonar kvikindi sem eru landlæg. Við erum til dæmis komin með fimm tegundir af maurum, þrjár tegundir af kakkalökkum.“
Guðmundur mælir með ýmsu til að losna við þessar flugur. Meðal annars net fyrir glugga, hátíðnitæki sem eru fest utanhúss og sprey með afrísku sólblómi.
„Ég fann það út að úr afríska sólblóminu er unnið efni sem er ekki með neinu eitri í en allar flugur forðast það. Flugunum finnst vond lykt af því, en við finnum það ekki. En þetta er fáanlegt á spreyformi.“
