Nú þegar 1. september er genginn í garð er ljóst að haustið og veturinn eru á næsta leiti. Einar Sveinbjörnsson, veðurfræðingur hjá Blika.is, segir að næstu daga muni kólna umtalsvert.
„Hitinn hefur haldist til þessa á þokkalegu sumarróli, en næstu daga kólnar umtalsvert. Veðurstofan er þegar búin að gefa út gular viðvaranir vegna lægðar fyrir austan land, seint á fimmtudag og á föstudag. Ekta hreta lægð sem fylgjast þarf grannt með,“ segir Einar á Facebook-síðu Bliku.
Blika spáir +1°C á föstudag við Mývatn og gæti hitinn farið niður undir frostmark.
„Hins vegar gerir líkanið ráð fyrir óvenju mikilli úrkomu. Veðurstofan er á svipuðu róli með hita, en heldur minni úrkomu í heild sinni. Væntanlega fellur hún sem slydda eða bleytusnjór. 40-50 mm úrkomu er engu að síður meira en 10% ársúrkomu á þessum slóðum,“ segir hann.
Samkvæmt spákorti Bliku klukkan sex að morgni föstudags má búast við „ekta hreti með snjókum til fjalla norðanlands“ eins og það er orðað.
„Verst hvað það er snemma. Rétt er að setja þann fyrirvara að fari lægðin heldur austar verður mun minna úr veðrinu hér. Allt verður að falla saman ef svo má segja.“
Eins og Einar bendir á hefur Veðurstofan gefið út gula viðvörun um norðan- og austanvert landið sem tekur gildi síðdegis á fimmtudag. Samkvæmt henni er útlit fyrir norðan hvassviðri eða storm, 15 til 20 metra á sekúndu og talsverða úrkomu.
„Hiti verður nærri frostmarki og því líklegt að úrkoma falli sem slydda ofan 200 metra yfir sjávarmáls og sem snjókoma ofan 400 metra. Veðrið gæti skapað vandræði fyrir búfénaði, einkum kindum til fjalla. Líklegt er að færð spillist á fjallvegum og ferðalangar á svæðinu ættu að huga vel að veðurspám,“ segir á vef Veðurstofu Íslands.
