Haukur varar við í­skyggi­legri þróun: „Út­hrópað, sví­virt, smánað og bann­fært“

„Ótal margir hafa ó­æski­legar skoðanir, en rétt þeirra til þess að tjá þær þarf að verja fram í rauðan dauðann,“ segir Haukur Örn Birgis­son lög­fræðingur í bak­þönkum Frétta­blaðsins í dag.

Pistill Hauks hefur vakið tals­verða at­hygli, en ætla má að kveikjan að honum sé frum­varp til breytinga á hegningar­lögum sem lagt var fram fyrir skemmstu. Nái það fram að ganga getur það varðað tveggja ára fangelsi að af­neita, gera lítið úr eða rétt­læta hel­förina. Haukur nefnir fleiri mál sem tengjast þessari þróun.

„Það færist í vöxt að vilja út­hýsa þeim sem hafa hættu­legar, rangar, ó­skyn­sam­legar eða jafn­vel bara heimsku­legar skoðanir. Smátt og smátt eru skoðanirnar og fólkið sem þær hefur út­hrópað, sví­virt, smánað og bann­fært. Þetta verður æ al­gengara og eðli­legra með hverju árinu sem líður. Við hættum að malda í móinn og sam­þykkjum út­skúfunina svo lengi sem hún beinist ekki að okkur sjálfum.“

Haukur segir að sumt af þessu virðist sára­sak­laust og nefnir hann máli sínu til stuðnings at­vik þegar sígaretta var fjar­lægð úr munn­viki Bubba Morthens í kynningar­efni Borgar­leik­hússins.

„Bjór­dósir með mynd af reykinga­manni eru fjar­lægðar úr Vín­búðunum. Maður getur þó varla annað en brosað yfir íroníunni í því að ríkið banni ljós­mynd af reykjandi manni utan á á­fengis­dós, í ríkis­verslun sem selur einungis á­fengi og tóbak.“

Haukur segir að svo haldi þetta á­fram og vindi upp á sig. Fólki sem gagn­rýnir sótt­varna­reglur séu gerðir upp annar­legir hvatar, for­seti Banda­ríkjanna sé látinn hverfa af sam­fé­lags­miðlum og nú ætli ís­lenskir þing­menn að setja fólk sem talar heimsku­lega um Hel­förina í tveggja ára fangelsi.

„Í nafni um­burðar­lyndis og mann­gæsku stígur fram fólk, með ríkari rétt­lætis­kennd en aðrir, sem vill hafa vit fyrir hinum. Það virðist þekkja betur en aðrir hvaða skoðanir eru rangar og segja skerðingarnar nauð­syn­legar til verndar þeim sem eiga undir högg að sækja. Af­leiðingin er sú að tjáningar­frelsið sjálft á undir högg að sækja.“

Haukur bendir á að ótal margir hafi ó­æski­legar skoðanir en rétt þeirra til að tjá þær þurfi að verja fram í rauðan dauðann.

„Í tjáningar­frelsinu felst nefni­lega einnig rétturinn til þess að hafa rangt fyrir sér. Að standa vörð um tjáningar­frelsið, felur í sér að standa vörð um réttinn sjálfan en ekki skoðanirnar.“