Haukur Örn Birgisson, lögmaður, segir frá því í bakþönkum Fréttablaðsins í dag að hann hafi greinst með Covid sjúkdóminn í síðustu viku. Hann er langt frá því að vera sáttur við aðgerðir sóttvarnaryfirvalda.
„Sóttkví er auðvitað ekkert annað en stofufangelsi, án þess að viðkomandi hafi gert nokkuð af sér. Refsivist án brots. Fyrir skemmstu voru 10 prósent Akureyringa í sóttkví, með tilheyrandi lömun fyrir bæjarfélagið. Er ekki kominn tími til að hætta þessu og halda lífinu áfram?“ segir Haukur.
Hann missti bragðskynið en kveðst þrátt fyrir það hafa verið nokkuð hress. Þó segist hann sjá eftir því að hafa ekki nýtt tímann betur í einangruninni. „Þetta hefur svo sem verið ágætt, mér hefur ekki leiðst í eina mínútu. Netflix hefur brotið upp einsleita fangavistina. Þar sem ég missti bragðskynið er eina eftirsjáin sú að hafa ekki fyllt bílinn af selleríi til að éta í tvær vikur í stað þess að eyða hitaeiningum í sælgæti, snakk og annað gúmmelaði sem ekkert bragð er af. Ég hefði getað komið til baka úr einverunni í toppformi.“
Hauki þykja aðgerðir sóttvarnaryfirvalda of harðar. „Það góða við daginn í dag er að nú sleppur fjölskyldan mín úr vikulangri sóttkví, fjarri vinum, skóla og æfingum. Þetta er nú meira ruglið! Ein vitleysan er sú að ég sé skikkaður í allt að fjórtán daga einangrunarvist, fullbólusettur, einkennalaus og heilsuhraustur. Enn furðulegra er að allir þeir sem ég komst í tæri við hafi verið sendir í sóttkví í heila viku (til upplýsinga hafa allir greinst neikvæðir). Eflaust lentu farþegarnir í sætum 28E og 28F í slíkri prísund. Afsakið það, ef þetta ratar til ykkar!“ segir Haukur.
