Haukur um um­deildasta þjálfara Ís­lands: „Í mínum huga er hann bestur“

„Ég er bara að reyna að koma því á fram­færi að ég hef æft þrjár í­þróttir af al­vöru í tveimur löndum með mörgum þjálfurum. Margir þeirra hafa verið afar góðir en aldrei hefur nokkur þeirra komist með tærnar þar sem Brynjar hefur hælana.“

Þetta segir Haukur Sigurðs­son, fyrr­verandi körfu­bolta­maður, um um­deildasta þjálfara Ís­lands um þessar mundir, Brynjar Karl Sigurðs­son.

Heimildar­myndin Hækkum rána hefur vakið mikið um­tal undan­farna daga eftir að hún var tekin til sýninga í Sjón­varpi Símans á dögunum. Í myndinni er fylgst með ungum körfu­bolta­stúlkum og þjálfara þeirra, títt­nefndum Brynjari, sem fer nokkuð ó­venju­legar leiðir í þjálfun. Hann er grjót­harður, innan vallar sem utan, og þjálfar stúlkurnar eins og leið­toga utan vallar og af­reks­konur innan vallar.

Sitt sýnist hverjum um þær að­ferðir sem Brynjar notar en hann þykir býsna harður í horn að taka og á­kveðinn við stelpurnar. Margir hafa hrósað honum í há­stert á meðan aðrir hafa gagn­rýnt að­ferðir hans. Eitt er þó víst og það er að árangur stelpnanna lét ekki á sér standa.

Sjá einnig: Hissa á já­kvæðum við­brögðum við körfu­bolta­mynd og „varpar sprengju út í kos­mósið"

Haukur var ungur að árum þegar Brynjar þjálfaði hann í ung­linga­flokkum Vals í körfu­bolta fyrir rúmum tuttugu árum.

„Við vorum 15 ára Val­sarar og enda­laust öfund­sjúkir út í eldri flokkinn sem hafði skyndi­lega fengið þjálfara sem reif þá úr meðal­mennsku og gerði að Ís­lands­meisturum á einum vetri. Það varð allt öðru­vísi að spila við þessa stráka og leikskilningur þeirra var þá orðinn á við at­vinnu­manna. Sagnirnar um ein­hvern ofur­þjálfara hljómuðu um alla ganga Vals­heimilisins. En hann var grjót­harður. Ef þú varst ekki til­búinn til að gefa allt á hverri æfingu, þá þurftirðu virki­lega að fara í sjálfs­skoðun,“ segir Haukur og bætir við að Brynjar hafi hjálpað leik­mönnum með þessa sjálfs­skoðun.

Haukur segir að árið eftir hafi Brynjar tekið við flokknum sem hann spilaði með og árangurinn var ekki lengi að koma í ljós.

„Við urðum að vísu ekki Ís­lands­meistarar en allt í einu gátum við unnið KR. Það hafði aldrei gerst áður. Og önnur lið urðu hvumsa þegar okkur tókst að spila eins og Brynjar reyndi að kenna okkur. Það varð ekta bar­átta um sæti í byrjunar­liði. Við fórum að spila eins og full­orðnu hetjurnar okkar og fyrst og fremst eins og ekta lið. Ekki lengur bara þrjú ein­föld sóknar­kerfi heldur átta sóknar­kerfi og jafn­mörg varnar­kerfi. Bara spurning hvaða kóða leik­stjórnandinn hrópaði,“ segir Haukur.

Hann segir að Brynjar hafi látið leik­menn fá heima­nám með út­prentuð leik­kerfi með út­skýringum, prósentu­skráningu á skot­nýtingu, veitt leik­mönnum per­sónu­lega at­hygli og þróað þá ein­stak­lings­bundið í sam­hengi við þær stöður á vellinum sem passaði þeim best.

„Þybbnir strákar komust í form og menn fóru allt í einu að ná að hoppa upp í hring. Hann barðist fyrir auka­æfingum og bæði ég og mamma munum vel að til þess að fá að æfa í aðal­salnum, þurftum við mæta á æfingar 8:30 á sunnu­dags­morgnum,“ segir Haukur sem skrifaði at­hyglis­verða færslu á Face­book um upp­lifun sína. Í pistlinum skrifaði hann meðal annars:

„Bæði mamma og pabbi spurðu mig reyndar líka hvort þetta væri "allt í lagi", þ.e. hitinn, hegðunin og há­vaðinn á bekknum í leik­hléum. Brynjar var "all-in". En mamma og pabbi sögðu líka: „Rosa­lega eruð þið allt í einu orðnir góðir!“ Og þau sáu líka Brynjar taka utan um okkur eftir bæði sigur og tap. Hann var virki­lega þjálfarinn okkar innan vallar sem utan. For­eldrar mínir vita hversu hörð á­skorunin var en einnig hver var á­vinningurinn.“

Haukur segist hafa skrifað færsluna til að koma því á fram­færi að af mörgum góðum þjálfurum er Brynjar besti þjálfari sem hann hefur haft.

„Hann kennir fólki að verða betri og gleðst með þér gegnum allt ferlið. En enginn segir að ferlið sé auð­velt. Að verða vitni að út­völdum at­riðum úr ferlinu frá stúkunni eða tölvu­skjánum, gefur ekki nægi­lega skýra mynd af hver Brynjar er sem þjálfari. Í mínum huga er hann bestur. En ég skil vel að fólk sem veit þetta ekki fái sjokk þegar þau verða vitni að Brynjari. Ég vildi bara varpa ljósi á annan vinkil.“

Í sam­tali við Hring­braut í­trekar Haukur það að mörgum kynni að finnast að­ferðir Brynjars ný­star­ár­legar eða frumstæðar, eftir því hvernig á það er litið. Hann hafi þó náð eftir­tektar­verðum árangri, til dæmis hjá 1979-ár­ganginum hjá Val um miðjan 10. ára­tuginn eins og fjallað er um hér að framan.

„En þetta hefur verið hans leið til að gera fólk miklu betri í á­stundun sinni og það hefur virkað að miklu leyti. Og mig eða hópinn skorti aldrei hlýju frá Brynjari. Hann var alltaf góður við okkur og maður vissi hvað öskrin og skipanirnar snerust um.“