Fjölmiðlamaðurinn Haukur Hauksson er staddur um þessar mundir í Úkraínu í ferð fyrir fjölmiðlafólk í boði rússneskra stjórnvalda. Rætt er við Hauk í Fréttablaðinu í dag en þegar blaðið ræddi við hann var hann staddur í Donetsk-héraði í austurhluta Úkraínu.
Haukur er sjálfur rússneskumælandi og hefur verið búsettur í Moskvu um áratugaskeið.
„Þetta eru ferðir sem eru skipulagðar af fréttamannaþjónustu varnarmálaráðuneytis Rússlands fyrir innlenda og erlenda fréttamenn til að sýna þeim hvernig málin standa frá fyrstu hendi. Reyndar tekur meginstraums pressan ekki þátt í þessu, það er að segja BBC, CNN, Reuters, Guardian og þeir sem yfirleitt er vitnað í af öðrum,“ segir Haukur í Fréttablaðinu.
Eðli málsins samkvæmt er Haukur hallur undir Rússa og segir hann að Úkraína hafi þróast út í ákveðið bananalýðveldi Vesturlanda. Hann mælir þó ekki stríðinu bót eða réttlætir það en segir að fólk, ekki síst stjórnmálamenn og fólk í æðstu stöðum, verði að kynna sér hlutina og hvernig þeir byrjuðu.
„Forleikurinn að þessu er mjög grimmt borgarastríð þar sem stjórnarherinn var með stórskotaliðs loftárásir og annað á eigin borgara þar sem hvorki meira né minna en 14.000 manns voru drepnir. En hræsni vesturlanda og íslenskra stjórnvalda liggur í því að það hefur enginn neinn áhuga á því.“
Haukur segir það skrýtna tilfinningu að vera úti á götu, hlustandi á stöðugt sírenuvæl og jafnvel verða vitni að sprengjuregni.
„Það hafa dáið fleiri manns hérna síðasta sólarhring. Við sáum til dæmis skóla sem var sprengdur í loft upp,“ segir hann í viðtalinu en Haukur kom við í Maríupol sem er nánast rústir einar.
„Asovstal, þarna er púður, líklykt og saggi í lofti, blautar dýnur og annað. Þú ert að sjá við hvað þetta fólk er upp alið,“ segir Haukur.
Haukur segist ekki vera hræddur þó hann sé á mjög hættulegu svæði.
„Manns dauði kemur einhvern tíma. Ég tel bara nauðsynlegt að menn viti og þekki inn á þetta. Það er líka ábyrgðarleysi að kynna sér ekki hlutina ofan í kjölinn. Forsagan og forleikurinn að þessu er tragedía. En mín samviska og hrein og ef ég drepst hérna þá bara er það hið besta.“
Viðtalið við Hauk má lesa í heild sinni hér.
