„Staðreynd málsins er hins vegar sú að við höfum aldrei haft það eins gott og akkúrat núna. Hvað sem fýlupúkum samfélagsmiðlanna kann að finnast um það,“ segir Haukur Örn Birgisson í bakþönkum Fréttablaðsins í dag.
Haukur skrifar þar um þá neikvæðni sem á það til að lita umræðuna um málefni líðandi stundar.
„Á hverjum degi og oft á dag fáum við fréttir af farsóttum, stríðsátökum, glæpum, fátækt, gjaldþrotum og hungursneyð. Stórspilltum þingmönnum og hlýnun jarðar. Þessar fréttir hámum við í okkur og stjórnmálamenn espast upp við að sjá tölur yfir lesturinn. Þeir halda því áfram að tala og skrifa með hástöfum. Þeir bæta í. Fjölmiðlamenn flytja svo enn fleiri fréttir af sama meiði,“ segir Haukur og bætir við að neikvæðnin selji og það sé allt á útsölu.
„Við erum sólgin í hamfarir. Af lestri frétta er engu líkara en að við séum stödd á versta tímabili mannkynssögunnar. Við höfum aldrei haft það verra, erum á síðustu metrunum. Brátt verður þetta búið spil. Heimur versnandi fer. Eða hvað?,“ spyr Haukur og bendir á nokkrar athyglisverðar tölulegar staðreyndir.
„Á hverju ári deyja fleiri vegna ofáts heldur en hungurs. Fleiri deyja vegna sjálfsvíga heldur en stríðs, glæpa og hryðjuverka samanlagt. Fleiri deyja úr elli heldur en sjúkdómum. Þessar merkilegu upplýsingar eru aðgengilegar á vef Alþjóðaheilbrigðismálastofnunarinnar og eru auðvitað í engu samræmi við málflutning heimsendaspámanna,“ segir Haukur.
Hann bendir á að flókin velmegunarvandamál hafi nú tekið fram úr náttúruhamförum, farsóttum og hungursneyð sem stærstu vandamál heimsins. Þá hafi framfarir í heilbrigðisþjónustu stóraukið lífslíkur sjúkra og nýfæddra.
„Í fyrsta sinn í mannkynssögunni er það velmegunin sem reynist hamförum og illmennum hættulegri. Það eru mikil tímamót. Heimurinn stríðir við alls konar vandamál og ég ætla ekki að gera lítið úr þeim,“ segir hann og bætir við að lokum að við höfum aldrei haft það eins gott og nú. „Hvað sem fýlupúkum samfélagsmiðlanna kann að finnast um það.“
