Haukur Örn Birgisson lögfræðingur og pistlahöfundur Fréttablaðsins hristir hausinn yfir svokölluðum áhrifavöldum í bakþönkum blaðsins í dag.
Haukur bendir á að tímarnir séu breyttir og fyrir miðaldra mann sé erfitt að átta sig á síbreytilegu landslagi.
„Tölvur hafa leyst hefðbundna afþreyingu af hólmi og samfélagsmiðlar komið í stað persónulegra samskipta. Börn eru hætt að leika sér og horfa þess í stað á YouTube-myndbönd af öðrum leika sér. Mín eigin börn eru meira að segja farin að nota tölvuna til þess að horfa á myndbönd af öðrum leika sér – í tölvunni! Ég skil ekkert.“
Haukur segir að önnur hver manneskja sé nú kölluð samfélagsmiðlastjarna og sífellt fleiri teljist áhrifavaldar, hvað svo sem það nú þýðir.
„Á hverja hefur þetta fólk eiginlega áhrif og hvers konar áhrif hefur það? Áhrifavaldarnir, sem flestir unnu í genalottóinu, sýna sjálfa sig á tilgangslitlum ljósmyndum með meitlaða og undarlega þjáningarsvipi, í fráleitum stellingum sem ekki er hægt að koma sér í án utanaðkomandi aðstoðar – sem útskýrir kannski svipinn á þeim, þegar ég pæli í því,“ segir Haukur.
Hann segir að honum verði oft hugsað til fólksins sem þarf að taka myndirnar, hinum bókstaflegu fylgjendum ef svo má segja.
„Guð, hvað ég vorkenni þeim. Mikið hlýtur þeim að líða kjánalega þegar þeir hlaupa á eftir áhrifavaldi sínum tímunum saman, sem handstýrir þeim svo skerpan, lýsingin og sjónarhornið nái að fanga bakhluta áhrifavaldsins með hárréttum hætti. Bossamyndir virðast áhrifameiri en aðrar.“
Haukur segir að eflaust sé þýðingarlaust að klóra sér í hausnum yfir þessu öllu eða pirra sig.
„Þessar nýju atvinnugreinar eru komnar til að vera og verða sennilega lögverndaðar þegar fram líða stundir. Þangað til ætla ég að hafa áhyggjur af því hvaða stuttermabol ég vel fyrir bólusetningarsjálfuna. Sú verður lækuð.“
