Samkvæmt heimildum Fréttablaðsins tóku hátt í þrjátiu manns þátt í því að ráðast á þrjá menn í kringum tvítugt á Bankastræti Club í gærkvöldi.
Mennirnir særðust allir alvarlega en eru ekki í lífshættu. Þá höfðu hótanir verið birtar opinberlega á samfélagmiðlum fyrir árásina.
Samkvæmt heimildum Fréttablaðsins flugu hótanir á víxl opinberlega á samfélagsmiðlum skömmu fyrir árásina á Bankastræti Club í gærkvöldi. Mennirnir eru sagðir hafa verið „í stríði“ á samfélagmiðlum og birtust slíkar hótanir á Instreikningi eins mannanna sem er í haldi
Margeir Sveinsson, aðstoðaryfirlögregluþjónn, segir í samtali við Fréttablaðið að þetta sé eitt af því sem er til skoðunar hjá lögreglunni.
„Það er bara eitt af því sem við erum að skoða,“ segir Margeir. Hann gat ekki sagt frekari til um tengsl mannanna. „Nú er málið bara á frumstigi. Þetta er bara eitt af því sem við erum að skoða og sjá hver tengslin. Við erum að reyna ná utan um málið og átta okkur á fjöldanum og hverjir eru þarna að verki,“ segir Margeir.
Yfirheyrslur hafa verið í gangi bæði af vitnum og öðrum. „Og það bara heldur áfram,“ segir Margeir.
Fjórir voru handteknir í nótt eftir stunguárásina.
Tilkynning um málið barst lögreglu kl. 23.33 og hélt hún strax á vettvang, en fyrir liggur að það var hópur manna sem réðst inn á skemmtistaðinn og að þremenningunum, sem þar voru staddir í herbergi. Árásarmennirnir voru dökkklæddir og með grímur, en þeir yfirgáfu skemmtistaðinn um leið og árásin var yfirstaðin.
Talið er að þeir hafi verið innandyra í mjög skamman tíma, en leit að þeim hófst strax eftir að lögreglan kom á vettvang. Tugir lögreglumanna hafa komið að rannsókn málsins frá því í gærkvöld og nótt og hafa verið framkvæmdar allnokkrar húsleitir í þágu hennar.
„Rannsókn málsins er í forgangi hjá Lögreglunni á höfuðborgarsvæðinu, en við aðgerðirnar í gærkvöld og nótt hefur hún notið aðstoðar sérsveitar ríkislögreglustjóra. Rannsóknin beinist m.a. að því hvort árásin tengist uppgjöri eða hefndaraðgerðum, en á þessu stigi er of snemmt að fullyrða um slíkt. Svo virðist sem málsaðilar séu flestir Íslendingar, en það á eftir að skýrast frekar. Lögreglan vopnaðist vegna aðgerðanna í gærkvöld og nótt, en um mjög alvarlega árás er að ræða,“ segir í tilkynningu lögreglunnar.
