Hasar í Krónunni: Réðst á starfs­mann þegar hann var gripinn á lagernum

Héraðs­dómur Reykja­víkur hefur dæmt karl­mann í þriggja mánaða skil­orðs­bundið fangelsi fyrir þjófnaðar­brot og líkams­á­rás á síðasta ári.

Maðurinn var meðal annars á­kærður fyrir að stela raf­tækjum úr verslun Hag­kaupa í Skeifunni 9. júlí 2019. Rúmum mánuði síðar, eða þann 14. ágúst, stal hann mat­vælum í tví­gang úr verslun Krónunnar við Bílds­höfða fyrir sam­tals rúm­lega 80 þúsund krónur.

Maðurinn var á­kærður fyrir fleiri þjófnaðar­brot, meðal annars úr verslun ÁTVR.

Sama dag og maðurinn var tekinn fyrir þjófnað í Krónunni, þann 14. ágúst 2019, veittist hann með of­beldi að starfs­manni verslunarinnar. Í á­kæru segir að hann hafi tekið í báðar hendur starfs­mannsins og gefið honum hné­spark í nárann þegar starfs­maðurinn reyndi að stöðva för hans út af lager verslunarinnar. Starfs­maðurinn hlaut þrota og eymsli í vinstri nára.

Maðurinn játaði sök fyrir dómi en hann hefur ekki áður gerst sekur um refsi­verða hátt­semi. Við á­kvörðun refsingar var litið til játningar mannsins og þess að hann hefur nú farið í vímu­efna­með­ferð. Fangelsis­dómurinn er skil­orðs­bundinn til tveggja ára. Auk þess var honum gert að greiða Krónunni tæpar 97 þúsund krónur og ÁTVR rúm­lega fjögur þúsund krónur.