Rannsókn lögreglunnar á bílbruna sem varð í Grafningi á föstudagskvöld er í fullum gangi. Eins og komið hefur fram lést maður í brunanum. Rannsókn beinist að upptökum eldsvoðans og hvers vegna boð um eldinn bárust ekki lögreglunni á Selfossi á föstudagskvöld.
Morgunblaðið greinir frá því í dag að bifreiðin, gömul rúta af gerðinni Mercedes Benz, hafi verið innréttuð sem húsbíll. Maðurinn, sem talinn er hafa látist í brunanum, er sagður hafa átt athvarf sitt í bílnum og haldið til í honum um nokkurt skeið. Þannig er hann sagður hafa verið í Hveragerði síðasta vetur. Maðurinn er á fertugsaldri en hundar mannsins dóu einnig í brunanum.
Morgunblaðið hefur eftir Oddi Árnasyni, yfirlögregluþjóni á Suðurlandi, að nú sé rannsakað hver upptök eldsins voru í bílnum. Þá þurfi að staðfesta auðkenni mannsins þó talið sé víst að maðurinn sem fórst hafi verið sá hinn sami og hafði dvalið í bílnum undanfarin misseri.
