Haraldur Karlsson, íbúi í Háaleitis- og Bústaðahverfi, ákvað að senda bréf til íbúaráðs Háaleitis- og Bústaðahverfis eftir atvik sem hann varð vitni að á Bústaðavegi í byrjun desembermánaðar.
„Að morgni þriðjudagsins 1. desember síðastliðnum ók ég Bústaðaveg í austurátt og var á leið heim til heimavinnu eins og oft áður. Þegar ég nálgaðist gönguljósin sem staðsett eru við Ásgarð, þá gerðist nokkuð áhugavert. Þrír bílstjórar tóku sig til og óku rakleitt gegn rauðu ljósi, sem var þá grænt fyrir gangandi vegfarendur,“ sagði hann í bréfi sínu.
Morgunblaðið greinir frá því í dag að meirihluti íbúaráðs Háaleitis- og Bústaðahverfis vilji að hámarkshraði á Bústaðavegi verði lækkaður hið fyrsta, úr 50 kílómetrum á klukkustund í 30 kílómetra, og er ástæðan meðal annars fyrrnefnt bréf sem barst ráðinu. Þá hefur formanni ráðsins einnig borist til eyrna áhyggjur íbúa af hegðun ökumanna á svæðinu.
„Við fjölskyldan búum ofan við Bústaðaveg og nýtum okkur Fossvoginn talsvert allt árið um kring til útiveru og heimsækjum þar fjölskyldu og vini og þá nýtum við okkur jafnan þessi umtöluðu gönguljós. Okkur blöskrar stundum tillitsleysið og óvirðing fólks þegar það sér okkur nálgast ljósin, jafnvel alla fjölskylduna með barnavagn og kerru, þá er gefið í til að þurfa örugglega ekki að stoppa og bíða í nokkrar sekúndur. Þó að rauða ljósið sé búið að loga í 1,2,3 sekúndur – þá er brunað yfir,“ sagði Haraldur í bréfi sínu.
Vigdís Hauksdóttir, borgarfulltrúi Miðflokksins, leggst hart gegn því að hámarkshraðinn verði lækkaður. „Síðastliðin 5 ár hafa engin slys orðið þar sem ekið er á gangandi vegfarendur á þessum hluta Bústaðavegar, fyrir utan eitt sem átti sér stað kl. 02:35 þar sem ekið var á gangandi vegfaranda sem stóð út á miðri akbraut við sjoppuna á gatnamótum Bústaðavegar og Sogavegar,“ segir hún í bókun sinni.
Hún segir að aðalástæða þess að mikil umferð er á Bústaðaveginum sé vegna umferðarteppu sem búið er að skapa með „ljósastýringarþrenginarstefnu meirihlutans“. Fólk veigri sér við að aka Miklubraut og aðrar stofnæðar Reykjavíkurborgar.
„Þar sem er fólk og þar sem eru bílar er alltaf ákveðin hætt á slysum og ber hver ábyrgð á sjálfum sér í þeim efnum.“
Hún segir að það hafi einnig verið ákvörðun borgarstjóra og meirihlutans að lækka götulýsingu úr 50 LÚX í 20 LÚX fyrir skömmu.
„Það eitt og sér hefur skapað ómælda slysahættu langt umfram 50 km hámarkshraða í borginni allri. Til þess að tryggja öryggi gangandi vegfaranda sem best er farsælast að leysa götuþveranir með göngubrúm eða göngum undir stofnvegi."
Íbúaráðið ákvað að fara þess á leit að umferðarhraði á Bústaðavegi verði lækkaður niður í 30 km/klst hið fyrsta. Þannig yrði hagur barna, ungmenna og annara gangandi og hjólandi vegfarenda í hverfinu settur í forgang. „Einnig að lýsing við gangbrautir verði bætt sem og aðrar hugsanlegar heildrænar aðgerðir til að auka öryggi gangandi vegfarenda í og við Bústaðaveg."
