Haraldur Ingi Þorleifsson, stofnandi Ueno, starfsmaður Twitter og baráttumaður fyrir bættu aðgengi hreyfihamlaðra í almenningsrýmum, var einn af skattakóngum Íslands í fyrra.
Samkvæmt álagningarskrá ríkisskattstjóra, sem lögð var fram í gær, námu mánaðarlaun hans rúmum 102 milljónum króna samkvæmt greiddu útsvari.
Aðeins Magnús Steinarr Norðdal, fyrrverandi forstjóri LS Retail, var ofar á listanum en laun hans námu rúmum 117 milljónum króna á mánuði að meðaltali.
Haraldur Ingi seldi fyrirtæki sitt, Ueno, til Twitter í fyrra og ákvað hann að greiða skatt af sölunni á Íslandi. Vildi Haraldur með því styðja meðal annars við íslenskt heilbrigðis- og menntakerfi. Við söluna samdi hann um að stærstur hluti kaupverðsins yrði greiddur með launagreiðslum og varð hann í kjölfarið starfsmaður Twitter. Greindi Viðskiptablaðið frá því í vor að Haraldur hefði greitt um hálfan milljarð í tekjuskatt og launatengd gjöld hér á landi frá því að salan átti sér stað.
Í viðtali við Stundina útskýrir Haraldur þessa ákvörðun og segir að þegar hann var ungur átti hann nánast ekkert.
„Ef ég hefði ekki getað fengið örorkubætur þegar ég þurfti þær þá hefði ég ekki getað lifað af,“ segir Haraldur Ingi við Stundina. „Það er auðveldara að lifa með hærri tekjur en lægri. En það er samt alltaf erfitt að vera til,“ bætir hann við.
Hann segist hafa alist upp í verkamannafjölskyldu með líkamlega fötlun og hefði það ekki verið ókeypis menntun og heilbrigðiskerfi á Íslandi hefði lífið hans verið allt öðruvísi.
„Það væri best að við myndum líta á okkur sem eina heild. Við erum ekki að gefa eða þiggja, við erum að passa upp á hvert annað. Við þurfum öll stundum hjálp og við getum öll stundum hjálpað,“ segir Haraldur.
Hægt er að lesta ítarlegt viðtal Stundarinnar við Harald hér.
