Haraldi Axel Gunnarssyni, framkvæmdastjóra Hreyfils, þætti skynsamlegt að aflétta skemmtanabanni. Í samtali við Morgunblaðið í dag segir Haraldur að þegar lokað er í bænum virðist leiðin liggja í heimapartý.
Skemmtistöðum er gert að loka klukkan 23 á kvöldin en Haraldur telur að það hafi ekki komið í veg fyrir skemmtanahald – skemmtanaglaðir Íslendingar finni sér þá aðrar leiðir.
„Það er mikill akstur þegar djamminu lýkur klukkan 23 og svo myndast mikil törn í tvo tíma eftir það. Af skemmtistöðum virðist leiðin yfirleitt liggja í partí í heimahúsum. Að þeim loknum er fólki skutlað til síns heima,“ segir Haraldur við Morgunblaðið og bætir við að svo virðist vera sem lokun skemmtistaða klukkan 23 ýti undir verri drykkju.
„Ég hef heyrt að fólk sé ölvað snemma og það sé í talsvert meiri kappdrykkju en áður. Fólk hættir síðan ekki að drekka þegar stöðunum er lokað heldur fer annað og heldur áfram,“ segir Haraldur.
Steinþór Helgi Arnsteinsson, einn af eigendum Röntgen, sagði svipaða sögu í Síðdegisútvarpinu á Rás 2 í vikunni. „Leiðinlega trendið sem er búið að vera undanfarið er að það er orðin svolítið ölvun þarna rétt fyrir lokun og það myndast ekki alveg nógu gott andrúmsloft í miðbænum þegar er lokað klukkan 23. Það er keppni um leigubíla og allir að fara í eftirpartý,“ sagði Steinþór.
„Að einhverju leyti minnir þetta á ástandið þegar lokað var klukkan 3 og allir söfnuðust niður í miðbæ,“ sagði hann. Þórólfur Guðnason sóttvarnalæknir hefur bent á að mikil nánd sem stundum fylgir skemmtanalífinu sé óæskileg í því ástandi sem nú er. Þess vegna sé skemmtistöðum og börum gert að loka klukkan 23.
Steinþór benti á móti á að nú þegar væri mikil nánd milli fólks í miðbænum meðan staðir eru opnir. Veitingastaðir og barir væru þétt setnir meðan á opnunartíma stendur og því haldi þessi rök tæpast. Það sé í raun engum til hagsbóta að stöðum sé lokað klukkan 23.
