Íslenska landsliðið í fótbolta kemur saman á næstu dögum en liðið á leiki í undankeppni fyrir EM. Mikil umræða hefur verið í kringum liðið á síðustu dögum en þó sér í lagi vegna þess að Arnar Þór Viðarsson landsliðsþjálfari hefur ákveðið að velja ekki Albert Guðmundsson leikmann Genoa í liðið.
Rithöfundurinn Hallgrímur Helgason er allt annað en sáttur með Arnar en þó ekki endilega af þeirri ástæðu.
„Bráðum þrjú ár síðan hann tók við og Arnar Þór er enn ekki búinn að finna sitt lið, enn að hringla með menn og hringja í menn (sem hann velur svo ekki). Lars tók sér hálft ár í að finna liðið, alveg nýtt lið (fáir þekktu þá suma leikmennina), og hélt því svo nánast óbreyttu næstu árin. Ekki nóg með það, heldur velur Arnar Þór nú enn og aftur kynferðisbrotamenn í landslið Íslands eins og ekkert hafi gerst síðustu árin, eins og Vanda Sigurgeirsdóttir sé ekki orðin formaður KSÍ, eins og MeToo hafi aldrei gerst, eins og hugrakkar konur hafi aldrei stigið fram. Þetta sýnir fullkominn karlahroka, algera samfélagsblindu, sem og alvarlegt skilningsleysi á hlutverki og ábyrgð landsliðsþjálfara,“ skrifar Hallgrímur á Facebook.
„Hvernig á þjóðin að geta haldið með landsliðinu sínu með þessa skugga innanborðs? Og því ættu ungir og efnilegir fótboltamenn sem eru að spila sína fyrstu landsleiki að þurfa að líða fyrir þetta ástand? Afhverju mega þeir ekki fá nýtt upphaf með þjóðina að baki sér? Yfirleitt myndi maður enda sinn status um fótboltalandsliðið með “Áfram Ísland!” En því miður er það ekki hægt núna,“ heldur Hallgrímur áfram.
Stefán Jón Hafstein spyr Hallgrím hvað hann eigi við með þessu: „Blessaður félagi, hvað áttu við með þessu: "kynferðisbrotamenn í landslið Íslands". Ég átta mig ekki alveg á þessu. Best ég lesi listann aftur.“
Hallgrímur svarar Stefáni en vill þó ekki nafngreina leikmennina sem hann segir vera kynferðisbrotamenn: „Allir vita nöfnin ég sendi þér skilaboð,“ segir Hallgrímur.
Kristján Logason spyr: „Er einhver dæmdur afbrotamaður í liðinu?“ – „Dómar og kynferðisbrot – löng saga það“ segir Hallgrímur.
