Halldóra Mogensen, þingmaður Pírata, skrifar um fátæktí Fréttablaðinu í dag og segir skortur á aðgerðum viðhalda stöðunni eins og hún en í gær var alþjóðlegur baráttudagur gegn fátækt.
„Við vitum öll hvaða áhrif fátækt hefur á fólk. Líf fátækra einkennist af miklu álagi, vanlíðan og niðurlægingu, sem grefur undan andlegri og líkamlegri heilsu. Fátækt getur einnig haft langvarandi áhrif á börn, því þroski fyrstu áranna leggur grunninn að heilsu þeirra til framtíðar. Þess vegna er mikilvægt að tryggja börnum bestu mögulegu byrjunina í lífinu,“ skrifar Halldóra.
„Við vitum að þúsundir barna á Íslandi lifa við fátækt. Áætlað er að rúmlega tólf prósent íslenskra barna eigi á hættu að búa við fátækt. Einu af hverjum tíu börnum í okkar velmegunarsamfélagi er neitað um lífsskilyrði og tækifæri sem öðrum börnum bjóðast, bara vegna fjárhagsstöðu foreldranna.“
„Stærsta orsök fátæktar er að fólk á ekki nægilega mikla peninga. Besta leiðin til að leysa þetta vandamál er einfaldlega að tryggja að fátækt fólk eigi meiri peninga. Þetta vitum við. En samt finna stjórnvöld endalausar réttlætingar fyrir því að viðhalda fátækt fólks.“
„Algengasta réttlætingin er að það sé svo dýrt að afnema skerðingar, hækka bætur og tryggja að fólk eigi í sig og á – en það sem fylgir sjaldnast umræðunni er kostnaðurinn sem fylgir því að gera það ekki. Það er nefnilega afar kostnaðarsamt fyrir samfélagið að leyfa fátækt að viðgangast,“ skrifar Halldóra.
Hún hefur fengið skýrslubeiðni s´na samþykkta á Alþingi þar sem samfélagslegur kostnaður fátæktar verður kannaður til hlítar.
„Skýrslubeiðnin verður vonandi til þess að við hættum að tala um aukið fjármagn til velferðarmála sem útgjöld. Að uppræta fátækt er fjárfesting í fólki og samfélaginu sem skilar sér margfalt til baka.
Við þurfum að tryggja efnahagslegt öryggi fólks með auknum beinum framlögum og með því að draga úr skerðingum og skilyrðum í bótakerfinu. Svo þurfum við að hætta að tala um bætur. Þetta er arður, sjálfsagður hluti okkar í sameiginlegri velmegun samfélagsins,“ skrifar Halldóra.
