Hall­dór segir grunninn­viði selda úr landi í miðri kreppu: Friðjón segir það heimóttarlegt

Hall­dóri Auðar Svans­syni líst ekkert á fyrir­ætlanir Símans um að selja dóttur­fyrir­tæki sitt Mílu til franskra fjár­festa. Hann deilir færslu um þetta á Twitter og þar rífast þau Frið­jón Frið­jóns­syni hjá Sjálf­stæðis­flokki og Helga Vala Helga­dóttur hjá Sam­fylkingunni um málið.

Eins og fram hefur komið hefur þjóðar­öryggis­ráð fundað vegna sölunnar. þá greindi Frétta­blaðið frá því í kvöld að Ragnar Önundar­son hefði sent ráðinu erindi vegna málsins.

„Já endi­lega selja bara grunninn­viði úr landi í miðri kreppu. Allt mjög eðli­legt hér,“ skrifar gáttaður Hall­dór Auðar og deilir frétt um málið.

Frið­jón Frið­jóns­son, Sjálf­stæðis­maður, svarar Hall­dóri og segist ekki viss um að sjóðurinn ætli sér að taka ljós­leiðarana upp og flytja úr landi. „Þeir munu lík­lega vera hér enn,“ skrifar Frið­jón og drýpur kald­hæðnin af orðum hans og hefur hann greini­lega litlar á­hyggjur af málinu.

Þá svarar Helga Vala: „æ Frið­jón, þú veist nú betur en þetta.“

Frið­jón segir um tví­skinnung ESB sinna að ræða. „Það er ein­mitt stór­kost­legur tví­skinningur í ESB sinnum að ætla að mót­mæla því að evrópskt fyrir­tæki kaupi ís­lenskt. Hvað heldur þetta fólk að ESB sé? Bara gott veður, bagettur og ódýr bjór?“

Helga Vala spyr hvaða rugl þetta sé í Frið­jóni. „Við erum að tala hér um grunninn­viði, þjóðar­öryggi, ekki brauð.“

Rosa sniðugt að djóka bara með þetta

Ljóst er að Hall­dóri Auðar Svans­syni finnst lítið til um­mæla Frið­jóns koma. Hann vísar jafn­framt í um­ræðu úr Silfri gær­dagsins á RÚV þar sem meint stjórn­tæki VG versus Sam­fylkingar var rætt.

„Já rosa sniðugt að djóka bara með þetta. Þykir náttúru­lega ekki al­vöru um­ræðu­efni meðal Sjálf­stæðis­manna og hinna stjórn­tæku,“ skrifar Hall­dór.

Frið­jón svarar og segir fjár­magn fjár­magn, sama hvaðan það komi.

„eignin verð­mætið er grafið í jörðu á Ís­landi. Við þurfum að hætta þessum heim­óttar­skap, vissu þið að kanadískur líf­eyrsis­sjóður kennara á stærsta hlutinn í Kastrup?“ skrifar Frið­jón og fer mikinn.

„fjár­magn er fjár­magn, skiptir í al­vöru öllu málið að eignar­hald fyrir­tækisins sem á vírana í jörðinni sé ís­lenskt? Halda menn að vondir út­lendingar, aðal­lega Frakkar muni taka af okkur inter­netið? Jesús hvað þetta er heim­óttar­legt“