Ástráður Haraldsson, settur ríkissáttasemjari, hefur boðað samninganefndir Eflingar og Samtaka atvinnulífsins á fund sinn í Karphúsinu í kvöld og búið er að fresta upphafi boðaðs ótímabundins verkbanns um rúma fjóra sólarhringa að hans beiðni.
Þetta kemur fram í frétt Fréttablaðsins.
Á fundinum ætlar ríkissáttasemjari að ráðgast um framlagningu nýrrar miðlunartillögu.
Bæði Sólveig Anna Jónsdóttir, formaður Eflingar og Halldór Benjamín Þorbergsson, framkvæmdarstjóri SA hafa sagt að þau væru tilbúin að fresta öllum aðgerðum ef ríkissáttasemjari myndi boða þau til nýs fundar.
Sólveig hefur þá sagt að Efling myndi ekki standa í vegi fyrir atkvæðagreiðslu um nýja miðlunartillögu ef ríkissáttasemjari myndi leggja hana fram.
Í fréttatilkynningu frá Samtökum atvinnulífsins er greint frá frestun verkbannsins og hefst það nú að öllu óbreyttu mánudaginn 6. mars klukkan fjögur.
