„Það að segja frá því opinberlega að rannsóknir sýni að stafafura sé talin ágeng tegund og að hvetja til þess að hún verði notuð með varúð er hvorki hreintrúarstefna né öfgar,“ segir Árni Bragason landgræðslustjóri í samtali við Fréttablaðið í dag.
Þar svarar hann fullyrðingum Jónatans Garðarsonar formanns Skógræktarfélags Íslands í ályktun frá aðalfundi félagsins þar sem segir að herferð hafi verið rekin í fjölmiðlum og á samfélagsmiðlum gegn skógrækt og íslensku skógræktarfólki.
Svandís Svavarsdóttir hefur boðað sameiningu Skógræktar og Landgræðslu og hefur það ekki alls staðar fallið í góðan jarðveg. Í viðtali sagði Jónatan að Skógræktarfélagið hefði áhyggjur af því að sameiningin snerist um sparnað og að hætta væri á að skógræktin yrði undir bæði hvað varðar fjármagn og stefnu. Deilan snýst meðal annars um notkun stafafuru.
Sjálfur segist Árni hafa notað stafafuru sem jólatré í áratugi og vonar að Íslendingar auki notkun hennar í þeim tilgangi. „Ég vona að menn beri gæfu til að skipuleggja ræktun stafafurunnar og ræktunarsvæði þannig að slys verði ekki með sama hætti og orðið hefur með lúpínuna,“ segir hann.
Frétt Fréttablaðsins í heild sinni.
