„Þetta er náttúrulega stórhættulegt og þess vegna setti ég þetta inn,“ segir Snjólaug Elísabet Nielsen, íbúi í Grafarvogi, í samtali við Hringbraut. Snjólaug vakti athygli á hættulegum leik barna í hverfinu í Facebook-grúppu íbúa í gærkvöldi en búið var að koma fyrir stórum hnullungum úti á götu í hverfinu.
Ekki þarf að fjölyrða um hættuna sem gæti hlotist af því ef bifreið eða öðru ökutæki væri ekið á þá. Fyrir utan slys á fólki gæti tjónið hlaupum á hundruðum þúsunda. Snjólaug segir að sumir steinarnir hafi verið mjög þungir og ekki hlaupið að því að lyfta þeim af götunni.
Þetta er ekki í fyrsta skipti sem Snjólaug verður vitni að þessu en í gærkvöldi var hún í göngutúr við Skólaveg þegar hún sá hóp unglingsdrengja koma hnullungunum fyrir. Hún segir að piltarnir hafi verið á aldrinum 13 til 17 ára og einn hafi dottið þegar hann hljóp yfir móann hjá Engjaskóla.
„Fyrir utan þann sem datt, var einn í ljósum buxum en annars allir dökkklæddir,“ segir hún. Hvetur hún foreldra til að ræða þessi mál við börn sín.
„Ótrúlega leiðinlegt að sjá svona - kennum börnum okkar að bera virðingu fyrir náunganum og eigum hans. Annars langar mig bara segja gleðilega hátíð og hafið það gott,“ segir hún í innleggi sínu en myndin efst í fréttinni var tekin í gærkvöldi á meðan myndin sem birtist hér að neðan var tekin um daginn.
