Þeir sem hafa lagt það í vana sinn að drekka kaffi á hverjum degi vita að það getur verið erfitt að vera án þess – sérstaklega á morgnana eða í góðum félagsskap eftir góðan mat.
Þrítug kona í Melbourne í Ástralíu, Olivia White, var rúmlega tvítug þegar hún byrjaði að drekka kaffi. Það gerðist skömmu eftir að hún eignaðist sitt fyrsta barn og ekki leið á löngu þar til hún varð nánast háð kaffidrykkju. Henni leið hreinlega illa ef hún fékk ekki kaffi. En hvað gerðist þegar Olivia ákvað að hætta að drekka kaffi fyrir fjórum mánuðum?
Olivia sagði Mail Online í Ástralíu sögu sína sem er nokkuð áhugaverð, sérstaklega fyrir þá sem eiga erfitt með að láta kaffibollann frá sér. Olivia segist nú hafa áttað sig á því að gegndarlaus kaffidrykkja hafði slæm áhrif á andlega heilsu hennar og segir hún að einkenni á borð við kvíða og svefnleysi hafi horfið eins og dögg fyrir sólu þegar hún lagði kaffikönnuna til hliðar. Þá segir hún að einbeitingin sé betri nú en áður.
„Þegar ég hætti að drekka kaffi og neyta koffíns átti ég auðveldara með að einbeita mér,“ segir hún og bætir við að hún hafi haft betri stjórn á hugsunum sínum og átt auðveldara með að einbeita sér að hlutunum. Hugsanirnar hafi í raun ekki verið úti um allt.
Þeir sem drekka kaffi – sérstaklega síðdegis eða á kvöldin – kannast við að eiga erfiðara með að festa svefn að kvöldi eða jafnvel sofa verr þegar loks tekst að festa svefn. Olivia segir að eftir að hún losaði sig við koffínið hafi svefninn batnað til muna. „Ég er mun fljótari að sofna, ég get farið fyrr upp í rúm og vakna þar af leiðandi fyrr.“
Í umfjöllun Mail Online kemur fram að þó kaffi hafi sína kosti fylgi því einnig margir kostir að láta af kaffidrykkju. Vísað er í umfjöllun heilsuritsins Healthline sem segir að of mikil kaffidrykkja geti valdið auknum kvíðaeinkennum og stuðlað að verri svefni. Að láta af kaffidrykkju geti stuðlað að betri meltingu, betra jafnvægi á hormónakerfi líkamans, lægri blóðþrýsting, færri stundum þar sem höfuðverkir gera vart við sig og að sjálfsögðu hvítari tönnum.
