Gyða Hjartardóttir, félagsráðgjafi og aðjunkt við félagsráðgjafardeil HÍ, skrifar mikilvægan pistil fyrir fráskilda foreldra í Fréttablaðinu í dag en jólin geta oft verið erfiður tími fyrir skilnaðarbörn.
„Aðventan er hafin og jólin sem við lítum oft á sem tíma barnanna eru fram undan. Jólin eru jafnframt hjá okkur flestum tími fjölskyldunnar, tími gleði og friðar, þess að gefa og þiggja og síðast en ekki síst tími hefðanna. Flest okkar eiga hlýjar minningar af jólunum, minningar af góðum mat, jólagjöfum, ljúfri stemningu og samveru með þeim sem standa okkur næst. En hvað eru hefðir? Fyrir suma fela hefðirnar í sér að gera aldrei eins, spyrja fyrir hver jól, hvernig eigum við að halda jól þetta árið? Fyrir aðra snúast jólin og hefðir um að gera alltaf eins, borða alltaf það sama og breyta helst engu. Um helmingur íslenskra barna hefur gengið í gegn um skilnað eða sambúðarslit foreldra og er að alast upp á tveimur heimilum,“ skrifar Gyða.
„Fyrir þessar fjölskyldur og börn getur verið bæði nauðsynlegt og mikilvægt að skapa nýjar hefðir. Foreldrar sem skilja þurfa að byggja upp nýtt samband sín á milli, fara úr parsambandi og yfir í foreldrasamstarf og því geta fylgt áskoranir. Þá er aldrei mikilvægara að anda rólega og vanda sig við að hugsa hlutina upp á nýtt. Gott ráð í því sambandi er að hlusta á börnin, setja þeirra þarfir og óskir fram yfir sínar eigin langanir og væntingar þegar við skipuleggjum hátíðarnar og hvað við teljum vera góð jól,“ bætir Gyða við.
„Látum hátíðarnar snúast um barnslega gleði, frið, sem og hlýja og notalega samveru. Látum hefðirnar snúast um að vera saman hvort sem það er á nýjan hátt eða eins og alltaf hefur verið. Hvað með að halda aðfangadag á Þorláksmessu, skjóta upp flugeldum á nýársdag og hvað með að láta hefðirnar snúast um að gera aldrei eins, bara að vera saman? Því það erum við foreldrarnir sem leggjum línurnar um það hvernig börnin okkar upplifa hlutina og með því leggjum við okkar af mörkum um gleðileg jól fyrir alla,“ skrifar Gyða.
Gyða bætir við að þegar börn foreldra sem búa ekki saman eru spurð um hvernig þau vilja hafa lífið eftir sambúðarslit eða skilnað foreldra þeirra, segjast þau langoftast dreyma um að foreldrarnir geti talað saman þrátt fyrir að vera ekki saman lengur.
„Að þau geti átt í góðu foreldrasamstarfi þrátt fyrir að vera ekki lengur í parsambandi. Foreldrar sem eru fráskilin eða hafa slitið samvistum og eru að ala upp börn saman læra fljótt og eru langoftast leikin í því að skapa nýtt líf og nýjar jólahefðir eftir skilnað eða sambúðarslit. Þeir foreldrar þjálfast í og kunna vel að setja sínar þarfir til hliðar og horfa á hvað er best fyrir börnin en í lífinu mætum við alltaf einhverjum áskorunum sem við þurfum að takast á við,“ bætir Gyða Við.
Inni á stafræna vefnum www.samvinnaeftirskilnad.is er að finna fjölmörg stafræn námskeið með aðferðum og hagnýtum verkfærum fyrir foreldra til að fá betra foreldrasamstarf, meðal annars um jólin.
„Á vefnum er að finna góð ráð og hagnýt verkfæri fyrir alla foreldra, bæði þá sem takast á við áskoranir og líka þá sem allt gengur vel hjá. Námskeiðin Að skapa gott samstarf, Gerið skýrt samkomulag um umgengni og Leiðir til að semja um frí með börnunum eru til að mynda frábær á þessum tíma og geta gefið foreldrum nýja sýn á það hvernig best er að takast á við nýjan veruleika fjölskyldunnar. Vefurinn er opinn og aðgengilegur fyrir alla foreldra á Íslandi, innleiddur að danskri fyrirmynd á Íslandi í samvinnu við mennta- og barnamálaráðuneytið,“ skrifar Gyða.
„Leggjum okkur fram um að veita öllum börnum gleðileg og friðsæl jól, full af góðum minningum og munum að jólin eru okkar. Með ósk um gleðilega aðventu og jól fyrir öll börn, lítil og stór, í öllum fjölskylduformum,“ skrifar Gyða að lokum.
