Gunnar Þorsteinsson, oft kenndur við Krossinn, veltir því fyrir sér siðferði fjölmiðlamanna hér á landi sé landfræðilegt og menn tali með einum hætti um þá sem eru landfræðilega nærri en með öðrum um þá sem eru fjarri.
Tilefnið er viðtal Bítisins á Bylgjunni í morgun við almannatengilinn Friðjón Friðjónsson. Þar var Friðjón mættur til að tjá sig um stöðuna í Bandaríkjunum en eins og kunnugt er hafa mótmæli verið þar undanfarna daga, vikur og raunar mánuði vegna ofbeldis lögreglumanna í garð svartra.
Í þættinum í morgun talaði Friðjón um Donald Trump Bandaríkjaforseta sem „appelsínugula skrímslið“ og virðist Gunnar ekki beint sáttur við þetta orðaval.
„Skolhærða skrýmslið í stóli forsætisráðherra.......ef ég mundi tjá mig með þessum hætti mundi ég gengisfella sjálfan mig og gera það að verkum að menn tækju ekki mikið mark á orðræðunni,“ segir Gunnar á Facebook-síðu sinni og nefnir svo ummælin í morgun.
„Mér var brugðið, en þáttastjórnendur gerðu engar athugasemdir. Atvik sem þetta eru of algeng og sá sem hefur ummælin í frammi myndi aldrei láta sér slíkt um munn fara um innlendan stjórnmálamann. Ef hætta væri á að ummælin bærust til þess sem rætt er um myndu menn ekki hafa þau uppi, en hugleysinginn gerir þetta í trausti þess að fjarlægðin og smámennska þess er talar feli sporin.“
Gunnar segir að mikið megi tala um þá sem eru í forsetaframboði í Bandaríkjunum og það sé raunar undarlegt að þetta öfluga ríki búi ekki yfir meira mannvali. „En það veitir okkur ekki heimild til að tjá okkur eins og götustrákar.“
Gunnar segist oft hafa heyrt svipaða orðræðu þegar fréttamenn fjalla um dægurmál í Bandaríkjunum.
„Fréttaflutningurinn er á stundum mjög undarlegur og þeir sem fylgjast með erlendum fjölmiðlum efast um að sumir íslenskir fréttamenn kunni skil á enskri tungu. Getur það verið að siðferði fjölmiðlamanna sé landfræðilegt? Menn tali með einum hætti um þá sem eru nærri landfræðilega en með öðrum hætti um þá sem eru fjarri? Er þetta ekki hræsni?“
