Gunnar Smári Egilsson, fjölmiðlamaður og stofnandi Sósíalistaflokksins, veltir fyrir sér hvort Íslendingar eigi að hampa Ingólfi Arnarsyni mikið lengur. Gunnar Smári segist velta þessu fyrir sér nú þegar þjóðir heims eru að fella styttur af þrælasölum og þrælahöldurum.
Styttan af Ingólfi stendur á Arnarhóli en hún var hönnuð af myndhöggvaranum Einari Jónssyni. Hún var afhjúpuð árið 1924 og hefur því staðið í tæp hundrað ár. Ingólfur er sem kunnugt er talinn fyrsti landnámsmaður Íslands og nam hann hér land í kringum árið 870 að talið er.
Gunnar Smári segir í færslu á Facebook-síðu sinni að Ingólfur hafi bælt niður með ofbeldi fyrstu alþýðuuppreisn Íslandssögunnar þegar hann myrti frelsishetjurnar Dufþak og Helga í Vestmannaeyjum, þræla sem höfðu gert uppreisn gegn kúgara sínum Hjörleifi.
„Ingólfur hafði líkt og Hjörleifur keypt sér þræla og einnig rænt fólki og hneppt í þrældóm, sem sagt nokkurn veginn síðasta sort af manngerpi,“ segir Gunnar Smári og bætir við - innan sviga – að ekki sé til ein saga af mennsku Ingólfs, aðeins ómennsku.
„Vífill og Karli voru meðal þræla Ingólfs. Ef fólk vill ekki setja Dufþak upp á stall Ingólfs á Arnarhóli, mætti setja þar styttu af Karla eða Vífli sem táknmyndum hinnar kúguðu alþýðu í aldanna rás, þræla og vinnufólks. Nú eða vatnsberann hans Ásmundar sem nú er neðst í Bakarabrekkunni,“ segir Gunnar Smári.
Fjölmargar athugasemdir hafa verið skrifaðar við færsluna og sitt sýnist hverjum. Einn leggur til að styttan fái að vera áfram en stytta af Dufþaki verði sett á góðan stað.
Örn Úlfar Sævarsson, textasmiður og fyrrverandi spurningahöfundur Gettu betur, spyr á móti hvort ekki sé líklegt að þeir þrælar sem Gunnar Smári nefnir hafi sjálfir átt þræla á einhverjum tímapunkti. Því svarar Gunnar Smári:
„Humm, eins og að benda á að þrælahald hafi verið í Afríku í tengslum við stöðu svartra í US. Þetta snýst ekki kynþátta- eða þjóðernishyggju heldur þrælahald. Þrællinn er jafnmikill þræll þótt þrælahald sé stundað þaðan sem hann er ættaður.“
Gunnar Smári segir að það vanti raunar kafla í Íslandssöguna um örlög fyrrum þræla hér á landi á öldum áður. Einn veltir fyrir sér hvort þrælahald hér á landi hafi mögulega verið með öðrum hætti en erlendis og þrælarnir kannski ekki verið jafn miklir þrælar og ætla mætti. Því svarar Gunnar Smári: „Já, má vera að við höfum haft besta þrælakerfi í heimi eins og besta kvótakerfið, besta lífeyrissjóðakerfið, besta sóttvarnarkerfið og allt það.“