Gunnar Smári Egilsson, Sósíalistaforingi, er ekki par sáttur við ummæli Ásgeirs Jónssonar, seðlabankastjóra sem hann lét falla í ViðskiptaMogganum í morgun.
Ásgeir segir að muni komandi kjarasamningar reynast óraunhæfir að hans mati og kynda undir verðbólgu þá muni Seðlabankinn bregðast við því. Það sé hans lögboðna skylda, að tryggja virði gjaldmiðilsins og það þýði miklar vaxtahækkanir.
Gunnar Smári bregst við þessum orðum á Facebook hópi Sósíalista.
„Lesist: Mitt hlutverk er að viðhalda auð hinna ríku og ég mun gera allt sem þarf til þess. Ef þið haldið ykkur ekki á mottunni á meðan, þið auma launafólk og annars flokks borgarar, mun ég hækka vexti til að verja auð hinna ríku og grafa með því undan lífskjörum ykkar, sprengja upp húsnæðiskostnaðinn svo þið munið ekki eiga fyrir mat fyrir börnin ykkar.
Pakkið sem þið eruð; reynið að átta ykkur á hvar þið búið. Þið búið í verstöð Samherja þar sem hin fáu og ríku ráða öllu og þið engu.“
Þá bætir Gunnar Smári við:
„Þessi maður gerir engar athugasemdir við methagnað banka og stórfyrirtækja, engar athugasemdir við stjórnlaust okur hinna ríku, níðingsverk þeirra gegn samfélaginu. En hann öskrar úr sér augun þegar hann hugsar til þess að skúringakonan sem þrífur skrifstofuna hans vilji fá að eiga fyrir mat út mánuðinn. Hvílíkur sokkur.“
