Gunnar Smári Egilsson og Hannes Hólmsteinn Gissurarson áttu í orðaskiptum á Facebook eftir að sá fyrrnefndi hafði deilt skoðanagrein sem birtist á Vísi þar sem hann ræðir skattamál.
Gunnar Smári segir í grein sinni að almenningur borgi fyrir skattalækkun hinna ríku.
„Miðað við skattaframtöl fyrir árið 2021 má gera ráð fyrr sveitarfélögin missi um 19 milljarða króna vegna þess að útsvar er ekki lagt á fjármagnstekjur. Og þá bara vegna tekna 1% tekjuhæsta fólksins. 6 milljarða til til viðbótar ef við tökum fjármagnstekjur annarra með.“
Hannes Hólmsteinn segir það sé fróðlegt að skoða hverjir greiða skatta. „Það eru aðallega þeir tekjuhæstu. Hvað myndi gerast ef þau 10% sem afla hæstu teknanna, myndu öll flytja til útlanda? Myndu þeir, sem eftir sætu, koma í þeirra stað, svo að ekkert myndi breytast?“ segir Hannes Hólmsteinn í athugasemd við færsluna hjá Gunnari Smára.
„Það yrði eilíf jól,“ svarar Gunnar Smári. „Kosturinn við íslenska auðvaldið er að það hefur ekkert lagt til samfélagsins og allur auður þess byggir á auðlindum sem eru fastar við landið. Það er engin hótun um að fara með verksmiðjur til Kína eða neitt slíkt. Allt sem auðvaldið á hefur það rænt af almenningi. Það mætti því fara á morgun, það kæmi smá högg þegar það færi með ránsfenginn sinn en eftir það yrði allt betra,“ segir Gunnar Smári.
Hannes Hólmsteinn deildi síðan grein með Gunnari Smára sem titluð er „The Rich Pay More with Lower Tax Rates.“ Gunnar Smári tekur ekki vel í það og segir síðuna sem greinin birtist á vera „hlægileg áróðursmaskína bandarískra auðkýfinga.“
„Þú ert prófessor við háskóla; af hverju ertu að dreifa svona þvælu? Ekki að undra að þér hafi verið meinað að kenna í mörg ár og ekki fengið neitt birt í ritrýndum greinum, þú ert á kafi í Göbbelskum áróðri,“ segir Gunnar Smári.
