Gunnar Smári Egilsson, stofnandi Sósíalistaflokksins, bendir á að Donald Trump Bandaríkjaforseti hafi ákveðið að banna leigusölum í Bandaríkjunum að bera út leigjendur það sem eftir lifir ársins.
„Ríkisstjórn Katrínar Jakobsdóttur hefur ... ekki gert neitt til að verja leigjendur, sem tilheyra hópi hinna tekjulægstu og sem margir eru meðal þeirra sem misst hafa vinnuna vegna kórónafaraldursins,“ segir Gunnar Smári á Facebook.
Ríkisstjórn Donalds Trump tilkynnti á þriðjudag að leigusölum yrði meinað að bera út leigjendur út þetta ár. Á þetta við um einstaklinga sem eru í þeirri stöðu að geta ekki borgað leiguna. Þeir leigusalar sem brjóta gegn þessu banni gætu átt von á refsingu.
Umrætt bann kemur eftir tillögu frá Miðstöð sjúkdómavarna og forvarna í Bandaríkjunum, CDC, í ágúst síðastliðnum. Er það gert til að sporna gegn frekari útbreiðslu kórónuveirunnar, einstaklingar sem missa heimili sín þurfa þannig ekki að fara á vergang sem gæti aukið hættuna á útbreiðslu veirunnar.
