Gunnar Smári Egilsson, stofnandi Sósíalistaflokksins, leggur til að fólk taki Alþingi sér til fyrirmyndar og hætti að mæta í vinnuna á föstudögum.
Gunnar gerir nýlega frétt RÚV að umtalsefni en samkvæmt henni mun vinnuvika þingmanna breytast. Þannig verða ekki þingfundir á mánudögum og hvorki þingfundir né nefndarfundir á föstudögum. Á mánudögum er gert ráð fyrir að nefndarfundir standi frá klukkan 9-11 og frá 15-17, en þar á milli verði fundir í þingflokkum.
Um er að ræða hluta af tilraunaverkefni þingsins í tengslum við innleiðingu á styttingu vinnuvikunnar.
„Mér finnst að fólk eigi að taka þessu sem almennum reglum og hætta að mæta til vinnu á föstudögum,“ segir Gunnar Smári í innleggi á Facebook-síðu Sósíalistaflokksins.
Hann segir að samkvæmt þessu sé auðvelt að koma á fjögurra daga vinnuviku.
„Í leikskólunum er fólk að versla með kaffitíma og leyfi til að skreppa til tannlæknis í skiptum fyrir að fá að fara 13 mínútum fyrr heim. Þingmennirnir stúta hins vegar föstudeginum án erfiðis og halda eftir öllum fríðindum. Magnaður hópur. Lætur ekkert stöðva sig í sókn eftir meiri velferð og þægindum ... fyrir sjálfan sig.“
Mörður Árnason, fyrrverandi þingmaður Samfylkingarinnar, minnir Gunnar Smára á að þingfundir séu ekki það sama og þingvinna. Þingfundir á föstudögum hafi verið undantekning áður en breytingin tók gildi. Því sé málið ekki eins einfalt og Gunnar Smári stillir því upp.
„Þingmenn hafa litla formlega vinnuskyldu og lítið sagt við því þótt út af bregði með mætingar á þing- og nefndarfundi, atkvæðagreiðslur. Veit ekki hvernig það ætti að vera öðruvísi. Það eru ekki endilega bestu þingmennirnir sem alltaf hanga við Austurvöll. Landsbyggðarmenn fara oft í hérað á föstudögum -- mér nýttust þeir vel í samfellda vinnu, lestur, skrift og samtöl. Það er ansi mikið hangs þessa þingfundardaga ef maður þarf að fylgjast með. Það sem alvöru-þingmaður hér þarf umfram allt er meiri aðstoð, helst sérstaka aðstoðarmenn. -- En það eru alls staðar letingjar og líka í þingflokkunum.“
