Dr. Gunnar Mýrdal Einarsson læknir, sérfræðingur í brjóstholsskurðlækningum og yfirlæknir Hjarta- og lungnaskurðdeildar Landspítalans lést þann 10. september síðastliðinn eftir harða baráttu við krabbamein.
Þetta kemur fram í tilkynningu frá aðstandendum.
Gunnar fæddist á Akranesi 1964 og var stúdent frá Fjölbrautaskóla Vesturlands 1984. Gunnar lauk prófi frá Læknadeild HÍ vorið 1991. Hann lauk sérfræðinámi í almennum skurðlækningum 1998 og í brjóstholsskurðlækningum frá Uppsalaháskóla árið 2001. Gunnar varði doktorsritgerð sína við Uppsalaháskóla árið 2003 og lauk MBA námi í stjórnun við HR árið 2016.
Gunnar fór til sérnáms í Svíþjóð árið 1996 þar sem hann starfaði við Centrallasarettet Västerås fyrstu 2 árin. Starfaði síðan við hjarta- og lungnaskurðdeild Uppsala Akademiska Sjukhus þar sem hann var yfirlæknir árin 2006 – 2008. Gunnar fluttist heim til Íslands árið 2008 og starfaði sem sérfræðingur við brjóstholsskurðlækningadeild LSH frá þeim tíma og var yfirlæknir við deildina frá 2016. Gunnar sat í stjórn Læknafélags Íslands 2018 – 2019 sem aðildarfulltrúi félags sjúkrahúslækna. Eftir Gunnar liggja margar fræðigreinar og rannsóknarskýrslur.
Foreldrar Gunnars voru Einar S. Mýrdal Jónsson, f. 1928, d. 2018, skipasmiður á Akranesi og Hulda Haraldsdóttir, f. 1929, fv. starfsmaður hjá Pósti og Síma á Akranesi. Eiginkona Gunnars er Ingibjörg Kristjánsdóttir, f. 1979, lyflæknir og sérfræðingur í hjartalyflækningum. Gunnar lætur eftir sig 7 börn og eina ófædda dóttur.
