„Mín ástkæra Jónína Benediktsdóttir er látin. Guð blessi minningu hennar,“ segir Gunnar Þorsteinsson, fyrrverandi eiginmaður Jónínu Benediktsdóttur. Jónína varð bráðkvödd á heimili sínu í Hveragerði í gær, 63 ára að aldri.
Jónína og Gunnar gengu í hjónaband árið 2010 en skildu að borði og sæng árið 2019. Þrátt fyrir það voru þau áfram góðir vinir og báru augljóslega hlýju í brjósti hvort til annars.
Margir hafa minnst Jónínu eftir að greint var frá andláti hennar í morgun. Steinunn Ólína Þorsteinsdóttir, leikkona og fjölmiðlakona, sagði til að mynda að með fráfalli hennar væri farin litrík og margslungin kona sem yrði sárt saknað.
Illugi Jökulsson, fjölmiðlamaður og rithöfundur, minntist hennar sem frjálslyndrar og fjörugrar konu sem hann kynntist á Ríkisútvarpinu þegar hún hóf að kenna leikfimi þar.
„Það var alltaf gaman að hitta hana á förnum vegi og stundum á Facebook seinni árin. Ég votta ástvinum hennar alla mína samúð.“
Þá minnist Eva María Jónsdóttir fjölmiðlakona Jónínu með hlýjum orðum, en Jónína kenndi henni leikfimi á sínum tíma.
„Hún var mjög stór persóna sem ég leit upp til. Er minnisstætt þegar hún fékk okkur nokkrar litlar stelpur til að sýna handahlaup og léttar leikfimiæfingar á afmæli SÁÁ eða stofnfundi í Háskólabíói, var of ung til að pæla í tilefninu. En mér þótti vænt um hana og fannst hún skemmtileg og merkileg og ég sé eftir henni. Minningin lifir.“
