Gunnar hitti skuggalegan mann í Borgartúninu og rétti honum seðlana - Lífið breyttist til hins betra á svipstundu

„Þið þarna á­kvörðunar­fólk! Dragið nú hausinn úr myrkrinu og hættið þessu rugli,“ segir Gunnar Dan Wi­ium smíða­kennari í mjög svo at­hyglis­verðri að­sendri grein sem birtist á vef Vísis í dag.

Í grein sinni lýsir Gunnar þeim já­kvæðu á­hrifum sem CBD hefur haft á hann. Gunnar fer ekki í graf­götur með það að hann er fyrr­verandi fíkill, hann byrjaði ungur að reykja gras og notaði önnur vímu­efni einnig. Hann hefur verið edrú í fimm ár en segir að hann búi yfir á­kveðnu of­næmi þegar kemur að hugar­fars­breytandi efnum. Þegar hann fær þessi efni inn í kerfið getur hann illa hætt.

Í grein sinni lýsir Gunnar því að hann lifi nokkuð heilsu­sam­legu lífi í dag en í gegnum tíðina hafi hann glímt við króníska verki í mjó­baki, vöðva­bólgu í öxlum og verki í öðru hnénu.

„Ég var að upp­lifa litla gleði og sjálfs­mildi, svaf ekki vel og meltingin var alltaf svo­lítið laus. Svo svona heilt yfir, alveg á­gætur en nett hakk alltaf í gangi, nett hakk sem ég lifði bara með því á­standið sem ég var að koma úr var langtum verra í alla staði.“

Skugga­legur maður á bíla­stæði

Hann segir að þegar bak­verkirnir hafi á­gerst hafi hann haft sam­band við lækni sem bauð honum sterk lyf­seðils­skyld verkja­lyf sem hann af­þakkaði – minnugur á­hrifanna sem slík lyf hafa haft á hann. Hann hafði því sam­band við vin sinn sem hafði sagt honum frá heilunar­krafti CBD á stoð­kerfið. Úr varð að hann skráði sig á ís­lenska sölu­síðu á Face­book. Hann lýsir því svo í smá­at­riðum hvað fyrir augu bar skömmu síðar.

„20 mínútum seinna stend ég á bíla­stæði bensín­stöðvar í Borgar­túninu með 16.000,- kall í vasanum. Ég hef staðið í þessum að­stæðum áður, beðið eftir dílernum eins og hann sé rokk­stjarna. Dílerar koma alltaf seint, hef aldrei hitt stund­vísan díler. En þeim er alltaf fyrir­gefið því eru með stöffið.

Seint um síðir mætir hann. „Líttu eftir stórum Audi með dökkar rúður og stórar ál­felgur, hann mun ekki fara fram hjá þér.“ Þetta voru skila­boðin.

Audíinn rennir inn á stæðið og út kemur steríó­týpan af díler, tússaður fram fyrir ermar og upp fyrir háls­mál. Hann er meganice og fullur sam­kenndar hvað varðar CBD og THC-ið reyndar líka. Sagðist vera ör­yrki eftir slys og nú væri hann bara að redda sér. Greini­lega með góðum árangri því bara blekið sem hann hafði sprautað í sig kostuðu nokkur mánaðar­launin mín, talandi nú ekki um sendi­ráðslimmuna hann mætti á í snattið.

Ég borga honum með seðla­búntinu og tek á móti lítilli flösku með á­föstum dropa­teljara. Seðlarnir hverfa þarna ofan í svart­hol svarts hag­kerfis „n­e­ver to be seen again“.“

Hræddist þetta í fyrstu

Það er skemmst frá því að segja að Gunnar prófaði dropana, fjóra dropa undir tunguna af full­spec CBD olíu. Hann viður­kennir að þetta hafi hrætt hann, meðal annars af þeirri á­stæðu að mögu­leiki væri á að hann leiddist út í fyrri neyslu. Þá óttaðist hann að finna fyrir vímu­á­hrifum og ekki síst á­liti annarra ef þetta myndi fréttast. Því hélt hann þessu leyndu til að byrja með.

Til að gera langa sögu stutta fann hann ekki fyrir neinum slíkum á­hrifum. Á­hrifin voru þau að að verkirnir sem höfðu á­gerst voru horfnir og hann fór að réttast af líkam­lega. Þá fann hann ekki fyrir neinum frá­hvörfum ef hann tók pásu.

„Það var eins og ég hefði meira pláss að innan, eins og ég væri laus við bólgur og vesen. Skapið breyttist í kjöl­farið. Fór að brosa meira, hegðun mín og hugsun fór ein­kennast meir af sjálfs­mildi. Ég fór að sofa betur og meltingin varð mun betri.“

Mis­býður þessi for­ræðis­hyggja

Svo vill til að inn­flutningur á CBD olíum, fram­leiddum sem fæðu­bótar­efni, er bannaður hér á landi. Gunnar gagn­rýnir það harð­lega og segir að á­kveðnir for­dómar liggi þar að baki.

Hann rifjar svo upp að síðast­liðið voru hafi inn­flutningur og sala á fræjum iðnaðar­hamps verið gerð lög­leg. Að upp­skeru lokinni má þurrka og vinna stönglana og eru þeir nýttir til dæmis í ein­angrun, textíl og margt fleira. Þegar stönglarnir hafa verið teknir standa eftir blóm og blöð og þau má þurrka og fram­leiða til dæmis te úr hrá­hampinum. En ef Kanna­bíóðarnir eru vaktir eða virkjaðir í gegnum hita gerist hann lög­brjótur. „Ef ég inn­byrði bakaðan hamp, hvort sem í smoothi eða undir hefð­bundinni te­drykkju gerist ég lög­brjótur.“

Gunnar segir að honum mis­bjóði þessi for­ræðis­hyggja. Hann nefnir að í fyrra­sumar hafi hann á­kveðið að gróður­setja og rækta um 200 plöntur af iðnaðar­hampi í garðinum hjá sér, en þremur mánuðum síðar voru plönturnar orðnar 160 sentí­metra háar og fullar af blómum og blöðum.

„Ég var mjög stoltur með sjálfan mig þegar ég stóð uppi með 200 grömm af ofn­bökuðum blöðum og blómum hér í haust. Kol­ó­lög­leg fram­leiðsla hér í Rauða­gerðinu en mér var mis­boðið og til­búin að taka hvaða af­leiðingum sem er,“ segir hann.

Verkirnir nánast horfnir

Í dag er staðan þannig að hann drekkur 2-4 bolla af CBD-hampi þrisvar til fjórum sinnum í viku. „Te­drykkjan hefur slakandi á­hrif á mig. Verkir í baki eru nánast horfnir, kemur fyrir ef ég er undir of miklu á­lagi. Ég er rýmri að innan, þá líkam­lega sem og að það er rýmra í hugar­fari mínu, vitundinni.“

Gunnar segist vera í skýjunum yfir þessu og kveðst hann hlakka til næsta sumars þegar hann ætlar að hefja ræktun á nýjan leik.

„Eins og er liggur hundurinn grafinn hjá Lyfja­stofnun sem flokkar CBD sem lyfja­efni í stað fæðu­bótar. For­senda þeirrar flokkunar er sú að í tveim lyf­seðils­skyldum lyfjum, Satvex og Epidiolex er uppi­staðan Kanna­bíóðar. Þessi lyf eru gefin út á Ís­landi í ör­fáum skömmtum við MS, Dra­vet syndrome og Lenn­ox-Gastaut syndrome.

Þið þarna á­kvörðunar­fólk! Dragið nú hausinn úr myrkrinu og hættið þessu rugli. Ef þið viljið stuðla að sam­eigin­legri vel­ferð og bættri lýð­heilsu þá gerið CBD fæðu­bótar­efni að­gengi­legt fyrir okkur fólkið.“