Gull­fal­leg fiðrildi flækjast til Ís­lands: „Að þessu sinni var fjöldinn um­tals­verður“

Nokkuð hefur verið um skraut­leg fiðrildi á flögri á sunnan­verðu landinu í sumar. Er­ling Ólafs­son skor­dýra­fræðingur heldur úti Face­book-síðunni Heimur smá­dýranna þar sem hann birtir reglu­lega skemmti­legan fróð­leik.

Í nýrri færslu segir hann að margir hafi haft sam­band vegna um­ræddra fiðrilda sem einkum hafa sést á sunnan­verðu landinu og ef til vill víðar. Um er að ræða svo­kölluð aðmíráls­fiðrildi sem berast til landsins á hverju sumri, stundum fá­ein en stundum í um­tals­verðum mæli.

„Að þessu sinni var fjöldinn um­tals­verður,“ segir Er­ling sem bætir við að einnig hafi sést þistil­fiðrildi en miklum mun færri.

„Fiðrildin hafa borist með hlýjum loft­straumi frá Suður-Evrópu. Á sama tíma komu til landsins land­svölur og bæja­svölur. Fiðrildi og svölur koma gjarnan sam­tímis,“ segir Er­ling sem birtir mynd með færslunni af aðmíráls­fiðrildi. Myndin var tekin í októ­ber í fyrra í trjá­lundinum Sól­brekku við Sel­tjörn í Reykja­nes­bæ. Er­ling segir að þá hafi verið tölu­vert af þessum fögru fiðrildum á ferðinni.

Í um­fjöllun Vísinda­vefjarins kemur fram að náttúru­legt út­breiðslu­svæði aðmíráls­fiðrilda sé í Suður-Evrópu, Norður-Afríku, á Mið-At­lants­hafs­eyjum og í Norður-Ameríku.

„Aðal­út­breiðslu­svæði þeirra er í Norður-Afríku og þaðan fara þau í göngum norður til Evrópu. Þau geta tímgast á Bret­lands­eyjum og myndað sumar­kyn­slóð, en lifa ekki af veturinn. Á Ís­landi eru aðmíráls­fiðrildi að­eins flækingar, fjölga sér ekki og lifa að sjálf­sögðu veturinn ekki af, frekar en annars staðar í N-Evrópu.“