Guðni Th. Jóhannesson, forseti Íslands, vill ekki tjá sig um ummæli Ólafs Ragnars Grímssonar, fyrrverandi forseta, um stækkun NATO og ábyrgð NATO ríkja á innrás Rússa í Úkraínu.
Þetta kemur fram á vef mbl.is en Ólafur Ragnar gagnrýndi ESB og NATO í Silfrinu um helgina fyrir að hafa gefið úkraínsku þjóðinni fyrirheit um aðild að samböndunum, án þess að meina það raunverulega.
„Kannski ættum við að líta á nýjan hátt á þessar kenningar sem urðu ekki ofan á, því sú lína sem varð ofan á var; stækkum NATO, tökum fleiri lönd inn og niðurstaðan af því er þetta hræðilega stríð,“ sagði Ólafur meðal annars.
Guðni Th. hefur sjálfur fordæmt innrás Rússa í Úkraínu. Sagði hann: „Sjálfstæði og fullveldi ríkja má ekki skerðast við það að þau eigi landamæri að hernaðarveldi.“
Ólafur Ragnar sagði inngöngu þessara landa í NATO ekki beinlínis ástæðu fyrir stríðinu.
„Nei, ég er ekki að segja að það sé ástæðan, en við verðum að hafa, um leið og við gagnrýnum Rússa miskunnarlaust fyrir þessa styrjöld og hvernig er farið er með fólkið, þá verðum við líka að hafa intellekt, heiðarleika og kjark til þess að horfast í augu við það að, til dæmis viðskiptaþvinganirnar sem við settum á eftir Krímskagann, þær hafa engum árangri skilað,“ sagði Ólafur.
„Það að stækka NATO og stækka NATO hefur leitt til mestu styrjaldar í Evrópu, það hefur alla vega ekki komið í veg fyrir það, og svo höfum við talið okkur sjálf trú um það að Rússland væri svo veikt efnahagslega.“
