„Covid-pest af sama toga kom upp 2004 en þá tókst að kæfa hana. Svínapestin gerði árás 2009 og nú hin banvæna pest á ný. Allt stafar þetta af sóðaskap og viðbjóði í kringum matvælamarkaði og verksmiðjubúskap,“ segir Guðni Ágústsson, fyrrverandi þingmaður og ráðherra, í aðsendri grein í Morgunblaðinu í dag.
Matvælaframleiðsla er Guðna hugleikin og hefur hann talað mikið fyrir því að Íslendingar geti staðið sjálfir undir framleiðslu matvæla. Í grein sinni í dag undirstrikar hann þessa skoðun sína og ræðir meðal annars áhrif COVID-19.
„Heimsmyndin er breytt og heimurinn hefur beðið tjón vegna heimsku og græðgi þeirra auðugustu. Flutningurinn á matvælum heimsálfa á milli er brot á mannréttindum og þaðan kemur fárið aftur og aftur, í dýraníði í verksmiðjubúskap, lyfjum og mengaðri jörð. Íslenskar sveitir eru matvælakistur ekkert síður en hafið kringum landið. Við eigum heita og kalda vatnið, svala lífsandann og eiturlausa jörð, heilbrigða búfjárstofna, góða bændur,“ segir Guðni í grein sinni þar sem hann hvetur stjórnmálamenn til að vakna og segja sig frá svona „alþjóðabrjálæði“ strax.
„Biðjum okkar bændur að framleiða matvælin. Því verða stjórnmálamennirnir að vakna af sínum vonda draumi og þjónkun við heildsalagróðann og fara að efla Ísland allt til matvælaframleiðslu. Kjötið allt, mjólkurvörur og grænmeti verði heimafengið og heimaræktað,“ segir Guðni sem segist hafa fengið góðar undirtektir við pistlum sínum að undanförnu.
„Hvar sem ég fer kemur fólk til mín og segir: „Þetta er rétt með landbúnaðinn, við eigum að efla hann.“ Þarna er unga fólkið statt sem í vaxandi mæli spyr sig hvað það setur í magann og hvaðan fæðan kemur og hvernig er meðferð dýranna og framleiðsluferlið. Við getum lifað enn betra lífi í landinu okkar ef heilbrigð sjónarmið fá að ráða ferðinni en ekki skyndigróði, og galin heimsmynd sem nú liggur í fjörbrotum. Vilji er allt sem þarf. Hvað vilja stjórnmálamennirnir?“
