Guðni Th. Jóhannesson, forseti Íslands, hvetur landsmenn til að fylgja tilmælum og leiðbeiningum nú þegar hertar reglur gegn COVID-19 taka gildi á morgun. Hvetur hann Íslendinga til að sýna hvað í þeim býr.
Guðni skrifaði eftirfarandi færslu á Facebook-síðu sína í kvöld.
„Kæru landsmenn.
Við erum í vanda. Á morgun verða varnir gegn veirunni skæðu þess vegna hertar enn frekar. Nýjar reglur gilda um höfuðborgarsvæðið. Kynnum okkur allar upplýsingar á covid.is. Stöndum saman í þessu. Við gerðum það í vor og getum það enn. Einhugur kemur okkur öllum til góða en langmest þeim sem á því þurfa helst að halda, fólkinu sem er veikast fyrir og þeim sem sinna sjúkum. Í stritinu miðju stoðar lítt að velta vöngum yfir því hvað hefði kannski mátt gera öðruvísi, ræðum það síðar. Ég hvet alla til að fylgja tilmælum og leiðbeiningum og verða þannig að liði í þessu ágæta samfélagi okkar. Samstaða í þágu þjóðar, þrautseigja í verki. Látum þetta sannast um okkur. Við erum öll almannavarnir. Sýnum hvað í okkur býr.“
