Guðni sendir þjóðinni skila­boð: „Gerum ekki illt verra“ - Fór í skimun í morgun

Guðni Th. Jóhannes­son, for­seti Ís­lands, segir að vonir hljóti að standa til þess að ó­hætt verði senn að slaka á hertum að­gerðum vegna út­breiðslu kórónu­veirunnar.

Guðni skrifar pistil á Face­book-síðu sína þar sem hann sendir þjóðinni bar­áttu­kveðjur, en hann hefur sjálfur dvalið í sótt­kví á Bessa­stöðum eftir að starfs­maður þar greindist með veiruna.

„Blessunar­lega heilsast honum vel og sjálfur kenni ég mér einskis meins. Ég í­treka þakkir fyrir hlýjar kveðjur sem mér hafa borist. Nú í morguns­árið fór ég í skimun á Land­spítala og reyndist nei­kvæður,“ segir Guðni.

Guðni nefnir í pistli sínum einnig fjölda þeirra sem hafa látist af völdum CO­VID-19 hér á landi að undan­förnu. Sem fyrr sendi ég ást­vinum sam­úðar­kveðjur.

„Að undan­förnu hefur smitum fækkað. Hertar að­gerðir gegn út­breiðslu far­sóttarinnar hafa greini­lega skilað árangri og vonir hljóta að standa til þess að senn verði ó­hætt að slaka á þeim að ein­hverju leyti. Gott hefur verið að sjá að lang­flestir í­búar landsins styðja at­beina sótt­varnar­yfir­valda og stjórn­valda, ekki vegna boð­valds þeirra heldur vegna þess að fólk hefur fundið gildi sam­taka­máttar í þessum efnum, komist að niður­stöðu um það á eigin for­sendum og eftir eigin hyggju­viti.“

Guðni segir að um leið verðum við að huga að því að varnir gegn veirunni skapi ekki verri vanda til fram­búðar á öðrum vett­vangi. Þessa jafn­vægis­list stundi stjórn­völd dag hvern, með vísinda­lega ráð­gjöf og önnur sjónar­mið í huga.

„Og þrátt fyrir allan okkar ærna vanda – eða jafn­vel frekar vegna hans – er brýnt að missa ekki móðinn. Far­sóttin og varnir gegn henni valda víða usla. Fólk hefur látist og veikst illa, margir hafa misst at­vinnu sína, fyrir­tæki berjast í bökkum, skóla­hald er með ó­venju­legum hætti og miklar skorður reistar við hvers kyns af­þreyingu og listum, tóm­stundum og í­þróttum. En hér verðum við líka að greina á milli á­falla og ó­þæginda. Gerum ekki illt verra með því að ýkja and­byrinn og gefast upp. Sýnum frekar hvað í okkur býr, leitum lausna, stöppum stálinu í hvert annað og látum ekki nei­kvæðni, beiskju og reiði ráða för. Það fer sjaldnast vel,“ segir Guðni sem minnir einnig á mikil­vægi hreyfingar og úti­veru fyrir líkama og sál.

„Það fann ég í minni sótt­kví að reyndist vel, komast undir bert loft, reyna að­eins á sig.“