Guðni sendir Guð­jóni tóninn: „Allt er betra og ó­dýrara á Spáni og þar er maturinn ódýr“

Guðni Ágústs­son, fyrr­verandi al­þingis­maður og land­búnaðar­ráð­herra, sendir Guð­jóni Sigur­bjarts­syni við­skipta­fræðingi tóninn í að­sendri grein í Frétta­blaðinu í dag. Um er að ræða svar Guðna við grein sem Guð­jón skrifaði og birt var í Frétta­blaðinu þann 3. júní síðast­liðinn.

Í grein sinni gagn­rýndi Guð­jón mál­flutning Guðna sem er mikill stuðnings­maður ís­lensks land­búnaðar. Sagði Guð­jón að land­búnaður á Ís­landi kostaði skatt­greið­endur 15 milljarða króna á ári og og neyt­endur, með toll­vernd og inn­flutnings­hömlum, 25 milljarða til við­bótar.

Í grein sinni í dag segir Guðni að Guð­jón sé sjálf­skipaður í liði höfuð­pauranna sem alltaf velja að vera á móti ís­lenskum land­búnaði. „Virkar öfga­fullur eða í hags­muna­bar­áttu, ekki ó­lík­lega launaður mála­liði and­spyrnu­hreyfingarinnar,“ segir Guðni um Guð­jón.

Í grein sinni skaut Guð­jón fast á Guðna og sagði að þegar hann hefði lokið sér af í sér­hags­muna­bar­áttunni fyrir bændur fari hann til Kanarí. „Þar borðar hann hin á­gætu mat­væli sem Spánn býður upp á og nýtur góða verðsins. Enda öruggur, því að meðal­aldur Spán­verja er hærri en Ís­lendinga, þrátt fyrir sýkla­lyfja­notkun í land­búnaði.“

Guðni segir að Guð­jón neiti öllum rökum um vanda ESB-bænda í notkun sýkla­lyfja í fóður bú­fjár. „Og allt er betra og ó­dýrara á Spáni og þar er maturinn ódýr. En maturinn þar er af­sprengi launanna. Þar kostar 12 evrur að klippa Guð­jón, og rauð­víns­flaskan kostar sára­lítið. Það er gott að vera á ís­lenskum launum þegar maður nýtur þessa hvort tveggja á Kanarí.“

Guðni segir að nú fari lítið fyrir hinum þremur aðal­and­stæðingum ís­lensks land­búnaðar. „Eða hvað heita þeir? Jú, Andrés, Ólafur og Þór­ólfur, sem líka lærði yfir sig í reiknikúnstum hag­fræðinnar,“ segir Guðni og á þar við Þór­ólf Matthías­son, prófessor í hag­fræði við Há­skóla Ís­lands.

Hann segir að þjóðin vilji ekki flytja græn­meti hingað frá Chile, hvað þá hrátt kjöt héðan og þaðan. Hann segir að á­stæðan sé þessi:

„Vegna þess að læknarnir og prófessorar heimsins, sem lærðu sér til gagns, mæla gegn því og fólkið dá­samar okkar ís­lensku land­búnaðar­vörur fyrir gæði og heil­brigði.“