Guðni Th. Jóhannesson og Guðmundur Franklín Jónsson mættust í kappræðum í Sjónvarpinu nú í kvöld. Eins og landsmenn vita fara forsetakosningar fram á morgun og loka kjörstaðir klukkan 22 annað kvöld. Skoðanakannanir benda til þess að Guðni muni vinna stórsigur.
Guðni og Guðmundur fóru um víðan völl í kappræðunum og var Guðmundur Franklín meðal annars spurður út í hans markmið með framboðinu. „Markmiðið er fyrst og fremst að veita þjóðinni málsvara og ég vil endurvirkja málskotsréttinn sem Ólafur Ragnar byrjaði á,“ sagði Guðmundur og minntist á Icesave í því samhengi. „Ég var mjög ánægður hvernig hann tók á því,“ sagði hann og bætti við að málskotsrétturinn hefði ekki verið nýttur síðustu fjögur ár.
Guðni var spurður að því hvort hann hefði verið móðgaður að fá mótframboð. Guðni sagði svo ekki vera enda hefði tíðarandinn breyst mikið og forsetaembættið þróast.
Guðmundur Franklín var spurður hvort Guðni hefði staðið sig illa og svaraði Guðmundur því til að hann hefði ekki staðið sig eins og hann hefði óskað. „Við getum sagt það svo. Ég er svolítið súr að hann hafi samþykkt orkupakkann, við erum að fara í djúpa efnahagslægð og hugur minn er hjá 80 starfsmönnum sem var sagt upp á Bakka og vinnufélögum þeirra sem standa tæpt,“ sagði Guðmundur og bætti við að orkan væri undirstaða efnahagslífsins.
Guðni sagði að kosningabaráttan hefði ekki komið honum á óvart. „Ég kveinka mér ekkert undan því sem á hefur gengið, sumt miður skemmtilegt,“ sagði hann og átti þar við ýmis orð sem hafa verið látin falla, vonandi í hita leiksins. „Ekki kvarta ég því það er frekar þannig að ég hef notið velvildar og hlýhugar.“ Guðmundur tók undir það að allskonar orð hefðu verið látin falla en hann sagði að þau myndu lýsa best því fólki sem lét þau falla.
Guðmundur Franklín var hvergi banginn þó skoðanakannanir bentu til þess að Guðni færi með stórsigur af hólmi. Ný könnun RÚV bendir til þess að fylgi Guðna verði um 93% en fylgi Guðmundar um 7%. „Þessi 7 prósent eru ansi drjúg. Við spyrjum að leikslokum. Ég er að opna augun á fólki fyrir vandamálunum sem blasa við okkur,“ sagði hann.
Guðni og Guðmundur voru sammála um að samskipti forseta við stjórn og stjórnarandstöðu ættu að vera mikil. Guðni sagðist halda reglulega fundi með forsætisráðherra og forystumönnum annarra flokka sé þess óskað. Guðmundur var sammála því og sagði að samskipti skiptu öllu máli.
Guðmundi hefur verið tíðrætt um málskotsréttinn í framboði sínu og nefndi hann nokkur dæmi um hvenær væri tilefni til að nota hann. Nefndi hann ESB-umsóknina, mögulega sölu Landsvirkjunar og orkupakka 4. Guðmundur er ekki þeirrar skoðunar að endilega þurfi einhvern tiltekinn fjölda undirskrifta til að skjóta máli til þjóðaratkvæðagreiðslu. Guðni er aftur á móti þeirrar skoðunar að krafan verði að koma frá þjóðinni og þá í formi undirskrifta sem þurfa að vera ákveðið margar. Guðni vildi þó ekki nefna neina ákveðna tölu.
Frambjóðendurnir voru svo spurðir hvernig þeir hefðu fjármagnað kosningabaráttuna og hvað hún hefði kostað. Guðmundur sagði að hann væri búinn að eyða um einni og hálfri milljón króna í baráttuna til þessa og þeir fjármunir hefðu komið frá styrktaraðilum. Þá sagðist hann hafa eytt um 500 þúsund krónum í bensín og hamborgara á ferð sinni um landið.
Guðni sagðist ekki hafa tölur um styrki á reiðum höndum en sagði að líklega hefði framboðið kostað hátt í tvær milljónir króna.
