Guðni Ágústsson, fyrrverandi þingmaður og ráðherra, segist gruna að hreinlæti hér á landi hafi verið á undanhaldi um nokkra hríð. Sjálfur kveðst hann hafa orðið vitni að ótrúlegum sóðaskap, til að mynda hjá ungum körlum eftir klósettferðir.
„Mér er sagt að í kjölfar spænsku veikinnar og með tilkomu mjólkuriðnaðarins og danskra mjólkurfræðinga hingað hafi hreinlæti stóraukist. Einnig risu húsmæðraskólar sem kenndu ungum stúlkum grundvallaratriði í hreinlæti og matargerð,“ segir Guðni í aðsendri grein í Morgunblaðinu í dag.
Guðni segir að tilefni greinarinnar sé sá grunur hans að hreinlæti hafi verið nokkuð á undanhaldi hér á landi um nokkra hríð.
„Ég hef sjálfur tekið eftir því á almenningssalernum að karlar og ekki síður þeir yngri þvo alls ekki hendurnar eftir athöfnina. Sé á götum úti að enn snýta menn sér í lófann og þurrka í buxurnar. Svo rétta þeir manni höndina og heilsa með veiruna milli fingranna.“
Guðni segist einnig hafa rætt við konu á dögunum sem sér um hreinlætisstörf í grunnskóla. Konan veitti því athygli hversu lítið gekk á sápur og handþurrkur á klósettum.
„Hún ræddi málið við skólastjórnendur og málið var tekið föstum tökum. Það var eins og við manninn mælt, kvefið og veikindi barnanna minnkuðu til muna. Nú þegar þríeykið Þórólfur, Alma og Víðir hefur kennt okkur svo margt í daglegum þáttum um mikilvægt hreinlæti og betri siði set ég þessa hugsun á blað. Þrifnaður er undirstaða góðrar heilsu og þar gegna foreldrar stærstu hlutverki en skólarnir og heilbrigðisyfirvöld eru í lykilstöðu með foreldrunum í uppeldi barnanna.“
Guðni endar grein sína á að nefna eitt til viðbótar sem virðist viðgangast nú til dags en var bannað áður fyrr.
„Gæludýr eru nú meðhöndluð eins og menn, sofa hjá börnum og eru ofan í vitum þeirra! Kötturinn fer út, en hvað ber hann með sér til baka? Húsdýrin voru mikilsvirt en þau voru ekki í eldhúsi eða svefnherbergjum barnanna.“
