Guðni Már Henningsson, fyrrverandi útvarpsmaður sem búsettur er á Tenerife, skilur ekki hvers vegna íslensk yfirvöld ganga ekki lengra í að hefta útbreiðslu kórónuveirunnar. Hann ber saman aðgerðir á Tenerife og svo á Íslandi í pistli sem hann skrifaði á Facebook í gær.
„Af hverju er ekki sett algjört samkomubann á? Af hverju eru skólar og leikskólar enn þá opnir? Af hverju er landinu ekki lokað eins og aðrar þjóðir gera?“ spyr Guðni og bætir við að yfir 400 manns hafi nú smitast af veirunni og sjö liggi á sjúkrahúsi. Samt sé enn opið fyrir ferðamenn, smitaða og ósmitaða.
„Og síðan reyna ráðamenn að fá Trump til að gefa Íslendingum breik, fá undanþágu frá banninu bandaríska. Svo er talað um að allir ættu að þvo sér sem oftast. Líklega til að forðast smit. En þó er í lagi að eitt hundrað manns geti safnast saman hvar sem er. Bara ef menn skrúbba sig vel og vandlega á eftir. Er þetta heimskt eða er þetta heimskt?“
Guðni Már ber þetta svo saman við stöðu mála á Tenerife.
„Ég má fara út í búð. Það mega vera tveir inni í einu, ekki hundrað manns. Ég má fara í bankann. Einungis tveir inni í einu enda komast líklega ekki fleiri fyrir því það er einungis opið fyrir hraðbankann. Veitingastaðir, barir, bíó og sundlaugar, allt er lokað. Hingað til Tenerife koma um það bil sex milljónir túrista á ári. Samt eru hér færri smitaðir en á Íslandi. Hér búa líka þrisvar sinnum fleiri og það á pínulitlu eylandi. Hér ríkir útgöngu- og samkomubann.“
Guðni viðurkennir að þó að þetta sé leiðinlegt sé það ef til vill hundrað sinnum betra en að smitast af COVID-19
