„Steingrímur hefur allt sitt líf tilheyrt þeim minnihluta sem Alþýðubandalagið gamla var og Vinstri-grænir eru,“ segir Guðni Ágústsson, fyrrverandi ráðherra og þingmaður, í aðsendri grein í Morgunblaðinu í dag.
Þar sendir hann Steingrími J. Sigfússyni, forseta Alþingis og þingmanni VG, væna pillu í kjölfar ummæla Steingríms um hinn grenjandi minnihluta í síðustu viku. Steingrímur steig þá í pontu vegna frumvarps um Hálendisþjóðgarð og sagði hann að málið nyti stuðnings þjóðarinnar. Hinn „grenjandi minnihluti“ ætti ekki að hafa neitunarvald.
Guðni segist hafa verið svo heppinn að hafa verið við sjónvarpsskjánum að horfa á umræður frá Alþingi þegar Steingrímur „reif af sér grímuna, steytti hnefann að fornum sið og hætti um stund að vera forseti Alþingis.“
„Á einu augabragði varð hann sá gamli góði Steingrímur sem við þekktum. Nú miklaðist hann af því að vera meirihlutinn og hans menn skyldu reisa draumaríkið á miðhálendinu. En „örlítill grenjandi minnihluti“ fékk heldur betur á kjaftinn. Steingrímur hefur allt sitt líf tilheyrt þeim minnihluta sem Alþýðubandalagið gamla var og Vinstri-grænir eru og sá minnihluti átti töluna tíu prósent af kjósendakökunni en var samt, að mati gamla ræðugarpsins, þá einnig handhafi meirihlutans.“
Guðni lýsir svo skoðun sinni á frumvarpinu og segir að með því sé ætlunin að reisa ríkisbáknið í fullri alvöru á þjóðlendunni miðhálendi Íslands.
„Nú kallar Steingrímur forseti, kominn í gervi gamla Steingríms, bændur, útivistarhópa og náttúruunnendur sem unna hálendinu eins og það er „örlítinn grenjandi minnihluta“, sem ætlar með heimsku að skjóta stærsta þjóðgarð í Evrópu úr hendi þjóðarinnar. Hugmyndin er að ríkisstofnun í Reykjavík taki að sér afréttarlöndin, sekti og rukki alla unnendur hálendisins, reki bændur og sauðkindina til byggða.“
Grein Guðna má lesa í heild sinni í Morgunblaðinu.
