Guðni hjólar aftur í Stein­grím: Gerðir lítið þegar þúsundir misstu heimili sín í hruninu

Rit­deilur þeirra Guðna Ágústs­sonar og Stein­gríms J. Sig­fús­sonar halda á­fram í Morgun­blaðinu í dag. Þeir hafa skipst á nokkrum vel völdum orðum að undan­förnu, eða síðan Guðni reið á vaðið og gagn­rýndi Stein­grím vegna frum­varps um há­lendis­þjóð­garð og „hinn grenjandi minni­hluta“.

Stein­grímur svaraði Guðna á föstu­dag og hefur Guðni nú brugðist við með annarri grein sinni á stuttum tíma. Þar talar hann um „hinn marg­breyti­lega“ Stein­grím J. Sig­fús­son og dregur upp mynd „af hinum tví­höfða Stein­grími J. Sig­fús­syni“ eins og hann orðar það.

Guðni fer þar yfir ýmis mál á löngum stjórn­mála­ferli Stein­gríms og sendir honum nokkrar eitraðar pillur. Hann rifjar til dæmis upp að fyrir kosningar 2009 hafi Stein­grímur sagt að á hans vakt yrði aldrei sótt um aðild að ESB.

„Hins vegar var það fyrsta verk ríkis­stjórnar hans og Jóhönnu Sigurðar­dóttur að sækja um aðild. Þetta var gert með braki og bramli í flokki vinstri-grænna og enginn gleymir hvernig fé­lagar hans voru lamdir og upp­nefndir „villi­kettir“. Þá missti foringinn fimm þing­menn fyrir borð en kosninga­lof­orðið varð að svika­myllu.“

Þá talar hann um skjald­borgina frægu sem ríkis­stjórn Jóhönnu og Stein­gríms ætlaði að slá um heimilin. „Allir muna að fjár­mála­ráð­herrann hafðist lítið að þegar þúsundir fólks misstu heimilin sín vegna hrunsins,“ segir Guðni en Stein­grímur var sem kunnugt er fjár­mála­ráð­herra árunum 2009 til 2011.

Guðni rifjar svo upp Icesa­ve-málið og kröfu Breta og Hollendinga um að Ís­lendingar þyrftu að borga. „Þjóðin hafnaði öllum kröfum um að borga þessa vit­leysu. Ólafur Ragnar for­seti hafði enn lagt vinstri­menn á lær sér.“

Guðni segir að þetta sé brot af því „merki­legasta“ sem drifið hefur á daga Stein­gríms í þeirri „löngu ei­lífð“ sem hann hefur starfað á Al­þingi.

„Eitt er víst að þú átt lang­flestar ræður sem þing­maður hefur flutt á Al­þingi í þúsund ár. En þær vitna um breyti­legan og frjáls­lyndan mann sem kann að skipta um skoðun, enda miklar breytingar átt sér stað frá 1983 til 2020. En ó­skap­lega finnst mér vænt um að þú reifst þig undan grímunni, sýndir þitt rétta and­lit og hættir að leika eitt­hvað allt annað en sjálfan þig.“