„Ætli ég hafi ekki verið að dunda við þetta í fimmtán ár, sem sýnir hvað maður er að verða hundgamall,“ segir Guðmundur Daníelsson í samtali við Fréttablaðið.
Guðmundur sem er búsettur í Laugarnesinu í Reykjavík fer svo til daglega út að tína upp draslið í hverfinu. Í Fréttablaðinu kemur fram að Guðmundur sé fyrir löngu orðinn að samfélagshetju í hverfinu fyrir starf sitt.
„Fólk stoppar og þakkar mér fyrir. Það er nóg fyrir mig,“ segir Guðmundur sem rifjar þó upp að eitt sinn hafi kona komið og gefið honum konfektkassa. „Svo þakklát kvaðst hún vera í minn garð.“
Eins og gefur að skilja hefur Guðmundur fundið ýmislegt í ferðum sínum.
„Já, blessaður vertu. Mest er þetta þó plastdrasl, en svo er óttalega mikið af sígarettustubbum og tóbakspúðum innan um sprautunálar og annan óþverra. En ég tíni þetta samt allt upp,“ segir hann.
Í viðtalinu í Fréttablaðinu kemur fram að eitt það óvenjulegasta sem hann hefur fundið er ómerkt umslag með 300 dollurum sem hann fór með á lögreglustöðina.
Hann grennslaðist fyrir um það seinna hvort eigandi fjárins hefði fundist, en löggan sagði svo ekki vera.
„Hvað verður þá um peninginn? spurði ég, og komst að því að löggan ætlaði bara að halda honum eftir. Ég er því ekkert viss hvað ég geri næst þegar ég finn ómerkt umslag með fullt af seðlum,“ segir Guðmundur en nánar má lesa um málið í Fréttablaðinu í dag og á vef Fréttablaðsins, Fréttablaðið.is.
